No. 1 Alcaraz a chak awlsam

Tennis inelna ngaihhlut hlawh Wimbledon khelh chhunzawm zel a ni a. Thawhlahnia inkhelah World No. 1 Carlos Alacaraz chuan awlsam takin hnehna changin second round a lut a. Tualchhung player ngaihven hlawh pahnih; Andy Murray leh Cameron Norrie te pawhin hnehna changin second round an lut ve bawk.
US Open champion, World No. 1 nih vanga Wimbledon 2023-ah champion tura rinkai ber ni bawk Carlos Alacaraz hian kum 36 mi Jeremy Chardy hmachhawnin bul a tan a, a khel tha nghal hle. Alcaraz hian tawnhriat ngah Chardy lakah tha chunchuang takin bul a tan a, set khatnaah game khat lek pawh hloh lovin set a la nghal. Set khatna-ah tha chungchuang taka a inlan hnuin set hnihnaah a khel tha chhunzawm a, game hnih chiah hloin set a la zui leh. Set hnih a lak awlsam em vangin second round lut tura inelna tawp tawh ang tlukna ngaih a ni a, mipa zingah Wimbledon-a champion thei naupang pathumna ni tuma hma lam pan Spaniard hi chak chiang tluka ngaih a ni der tawh.
Chiang zeta set hnih a hloh zawn hnuin Chardy hi set thumnaah a insiamtha hret a, game a la chho ve ta mawlh mawlh. Set a lak ve mai beisawm khawpa a khel that chhoh laiin uiawm takin a serve a hum zo lova, set a hloh leh ta nge nge. A tawp lam inkhel hmuhnawm ang reng akah Carlos Alcaraz chuan 6-0 6-2 7-5 in hnehna a chang ta a ni.
Player thiamna ril tak nei, thahrui nei tha leh fit em em mai Carlos Alcaraz hian French Open-ah Novak Djoko-vic a ngam lo a, Roland Garros-a final a lut zo lo. French Open atanga a tlak hnuin Wimbledon khel turin a inbuatsaih nghal a. Queen’s Open-ah champion a ni a, ATP Ranking-ah Djokovic a lehpel a, World No. 1 a ni nawn leh. World No. 1 ni chunga Wimbledon-ah a inlan theih vangin final hma chuan he hmuna vawi sarih ngawt champion tawh Djokovic a pumpelh a. Serb nen hian final-ah an inhmachhawn thei a nih chuan final duhthusam a ni ngei dawn a. Alcaraz hi Djokovic kawng dal thei ber tura ngaih a ni.
Murray leh Norrie an chak
Thawhleh zana Wimbledon match dangah tualchhung player ngaihven hlawh pahnih Andy Muarray leh Cameron Norrie ten hnehna changin second round an lut.
Wimbldon-ah vawi hnih champion tawh Andy Murray chuan Wilcard hmang he inelna hmachhawn thei Ryan Peniston a hmachhawn a, tualchhung tlangval ve tho lakah set hloh lovin hnehna a chang. Hliamin hun rei tak a tihbuai Murray hian Briton Ryan Peniston lakah bul a tan tha a, set khatnaah game thum chiah hlohin set a la. Set hnihnaah tha zual zawkin a inlan a, game khat mah hloh lovin set a la zui leh a. Awlsam taka set hnih a lak zawn hnuin set thumnaah game khat chiah hlohin set ala zui leh a, Peniston lakah hian 6-3 6-0 6-1 a hnehna changin second round a lut.
Grand Slam-ah vawi thum champion tawh a, World No. 1 pawh lo ni tawh Murray hi an tualchhunga inelna lianah hlawhtlinna chan tumin hma lam a pan a. Beisei anga a thleng sang thei lo a nih chuan Tennis chawlhsan thei dinhmuna a ding mek.
Thawhleh zan vek khan British number one Cameron Norrie chuan Tomas Machac a hmachhawn a. Kum liam taa semii-final hial thleng Norrie hian set khat hloh chungin hnehna a chang.
Norrie hian set khatnaah break a neih a chhawr tangkai a, harsa lutuk lovin set a la. Set hnihnaah a serve a hum zawh loh a tuar ve thungin set a hloh ve thung. Set a hloh hnuin tha zawkin a kir a, seet thumnaah game khat chiah hlohin set a la a. Set linaa break a neih chhawng tangkaiin set a la leh hram bawk a, Machac lakah hian 6-3 4-6 6-1 6-4 a chakin secon round a inhlangkai ta a ni.