Manipal Hospitals NE Media Conclave

Manipal Hospitals NE Media Conclave
Manipal Hospitals chuan February 5 & 6 chhung khan Kolkata-ah North East Media Conclave a buatsaih a, hmarchhak state panga atangin chanchinbumi 11 an tel a, Mizoram atangin mi pathum an tel.
Mizoram atanga telte hi MJA general secretary K Zothanpara, ex-officio Vanlalrema Vantawl leh member PC Zonuntluangi te an ni a. February 5 chawhmaah Manipal Hospitals EM Bypass (Medica Superspeciality Hospital thin) ah inkawmkhawmna hun hman niin, Manipal Hospitals EM Bypass-a hotute leh doctor engemawzatin thu an sawi. Chawhnu lamah Manipal Hospital pahnih – EM Bypass leh Mukundapur hmunhma fan a ni.
Manipal Hospitals hrang hrangah India hmarchhak mi 9200 chuang an enkawl tawh tih an sawi a; hmarchhak state hrang hrangah zuk leh hmuam bakah ei leh in avangin cancer a tam nia an hriat thu an sawi.
Manipal Hospitals EM Bypass hotuten robotic surgery an tih nasat tawh thu an sawi a; cancer enkawlna lam an ngaipawimawh a; cardiology, thluak lam (neurology), ruh , kal (nephrology), chuap leh pum leh ril lamah doctor tha tak tak an nei tih an sawi a ni.
February 6-ah Manipal Hospitals dang pahnih – Broadway leh Salt Lake tlawh a ni a. Manipal Hospitals Broadway hotute chuan, hmarchhakmite an ngaipawimawh tih sawiin, “NE mite ei duh zawng a danglam a, an duh ang chaw kan ngaihtuahsak thei. Kan nursing staff zinga zaa 60 vel chu hmarchhak mi an ni,” an ti.
Manipal Hospitals hian India rama khawpui 24-ah damdawi in 49 an nei a, an hmunpui chu Bengaluru niin, Kolkata bikah damdawi in panga – Manipal Hospitals – EM Bypass (Medica Superspeciality Hospital thin), Manipal Hospitals – Mukundapur (AMRI Hospital thin), Manipal Hospitals – Dhakuria (AMRI Hospital thin), Manipal Hospitals – Broadway (AMRI Hospital thin), Manipal Hospitals – Salt Lake (Columbia Asia Hospital thin) an nei.