Manipur-a Naga leh Kuki inkarah buaina chhuak nasa

Manipur-a Senapati district, T Khullen khuaah Naga leh Kuki pawlte ralthuam nen an intibuai nia sawi a ni a. Silai hmeh puah a ni a, tual chhung miten an hlauvin an chiai hle nia sawi a ni.
He thil thleng hi tun hnaia Imphal-Ukhrul kawngpui dunga mi thah a nih hnua hnam pahnih inkara buaina a chhuak kal zel kha a ni.
Inrinni khan Naga civil mi pahnih lambun an ni a, Naga chenna hmun hrang hrangah thinrimna leh inkhar kalpui a ni.
Tun hnaiah buaina a chhuak nasa hle nia sawi a awm a, mipui pawl leh hel pawl hrang hrangte chuan thu na tak tak tichhuakin an inpuh tawn nasa hle.
Sawi dan thenkhatah chuan buaina hi Senapati district hmun thenkhata buaina Kuki hel nia rinten Naga an lambun duh loh lantir nana United Naga Council-in inkhar leh kawngpui dan an tum nena inkaihhnaih a ni.
Buaina chhuaka thi leh hliam zat leh silaia inbeihna thlen dan hi thuneituten engmah sawi an la nei lo va. Boruak tidai turin venhim hna thawktute dah an ni tawh bawk.
Buaina thar chhuak leh hian Manipur-a himna dinhmun derthawnzia a tar langa ngaih a ni a, Naga leh Kuki pawlte inkara hun rei tak atang tawha ram leh politic-a inmil lohna awm chu tharum thawhnaah changin a irh chhuak fo thin.
Hetihlai hian Meitei tamna, phaizawl district panga bakah Naga-te chenna hmun, Ukhrul leh Senapati-ah te zirna in, sumdawnna leh vantlang inkalpawhna khar a ni.
Curfew bawhchhiain Thawhtanni zan khan Mayai Lambi atanga Imphal West district-a Keishamthong thleng, km sariha thui torch rally neih a ni a. Hetah hian a tam zawk chu hmeichhia ni mah se venhim hna thawktute nen an inbei nasa nia sawi a ni.
Thawhlehni khan Chief Minister Yumnam Khemchand-a chuan Wangjing-a BDO office thar chu boruak tang tar karah a hawng a. A tlawh duh lohna lantirin Thoubal, Khongjom leh Wangjing-a mipui pungkhawmin kawngpui an dang.
Chief minister hi helicopter-in a zin a, Assam Rifles camp-ah a tum a, lirtheiin a hmun a pan nghal a. Pungkhawmten Wangjing Tekcham Leikai bul, BDO office hmun hmaah dan an lo tum a, buaina a chhuak nasa hle.
Venhim hna thawktuten tear gas-in an kap a, hnawh darh tumin silai an hmet puak nia sawi a ni.
Chief Minister Yumnam Khemchand-a chuan BDO a hawnnaah tlangram district-a a zin kawngah harsatna a tawh loh laia phaizawl, Thoubal district-a a tlawhna dodalna a hmu chu mak a tih thu a sawi a. Inrem lohna awm chu dawhkan kila chin fel theih a nih thu a sawi bawk.
Manipur-ah hian May, 2023 atangin Meitei leh Kuki inkarah buaina a chhuak a, mi 260 vel thi an awm tawh a. Boruak dai deuh thin mah se a chhuak leh thin a, Naga leh Kuki inkara inepna boruak a awm deuh reng bawk.