BJP northeast in-charge Sambit Patra chuan Manipur tlawhin thutkhawm hrang hranga a tel hnuah BJP MLA-te chu Imphal-a City Hotel-ah a thutkhawmpui bawk a, hei hian saffron party hian hmarchhak state-ah hian sorkar thar siam leh a tum em ni tih zawhna a siam mek.
Titi awm mek chungchangah hian Patra-a emaw, BJP hruaitu zinga tu emaw mahin sorkar thar siam hi an la sawi lo thung.
Manipur hi President’s Rule-a awm mek a ni a, tun hnaiah mipui sorkar pangngai din leh tura phutna ri a ring leh tan mek a. Tun hnai khan BJP MLA 21 chuan Prime Minister Narendra Modi-a hnenah pawh ngenna an thlen.
Patra-a hi Churachandpur-ah kal phawtin a hnuah chief minister hlui, N Biren Singh chu a chenna, Luwangsangbam-ah a kawm leh a. Speaker Th Satyabrata-a inah a leng bawk.
Churachandpur-ah hian BJP national spokesperson leh state in-charge ni kawp bawk, Patra-a hian Thanlon bialtu MLA, May, 2023-a mipuiin an chil hrep hnua dam chhuak, Vungzagin Valte a tlawh a ni.
Nawrhlirha thu MLA Vungzagin Valte hi a chibai a. Churachandpur MLA LM Khaute leh zirlai pawl, Zomi Students Federation-a an hruaitute an tel bawk.
Kuki Zo Council (KZC) leh Zomi Council (ZC) hruaitute nen pawh inkharkhipin an inkawm bawk nia sawi a ni.
February 13 khan sorkar laipui chuan Chief Minister N Biren Singh-a a bân hnuah chi leh chi inkara buaina chhuak avanga tharum thawhna nasa taka a thlenna state hi President’s Rule-ah a dah a. State assembly pawh kum 2027 thleng hun la nei mah se hna thawk rih lo turin a dah nghal bawk.
Tar lan tawh thin angin Manipur-ah hian May, 2023 atang khan Meitei leh Kuki-Zo hnam inkara buaina a chhuah avangin mi 260 chuang an thi tawh a, mi sang telin himna zawngin an in leh lo tlanchhiatsanin baihvaiin an awm mek a ni.
Get real time updates directly on you device, subscribe now.