Manipur-ah CRPF te inrawlh thuk dawn

Union Home Secretary Ajy Kumar Bhalla chuan Manipur-a dan leh hrai lekkawhna lamah Central Reserve Police Force (CRPF) te chu an inhnamhnawih thuk tial tial dawn tiin a sawi.
“Manipur-ah CRPF te thuk zawkin an inhnamhnawih dawn a ni. CRPF te hian State-a tharumthawhna tihtawpna lamah an thawh hlawk hle a ni. Chu mai bakah raltlante chenna hmun tura sem darhna lamah pawh an thawk hlawk hle,” tiin Bhalla chuan CRPF 86th Raising Day lawmna neihnaah a sawi bawk.
May 3, 2023 atang khan Kuki-Zo leh Meitei te inbeihna avangin Manipur chu a la buai hle reng a. Mi 221-in nunna chan phah tawhin mi 60,000 chuang in leh lo chhuahsanin an awm mek bawk a. Manipur ah hian Indian Army leh Central Armed Police Forces (CAPF) 36,000 vel dahin an awn mek bawk.
Bhalla chuan hun lo la kal turah Agniveer tawnhriat nei tha leh disciplined te chu CAPFs ah te dah an ni ang a ti a. CAPFs tin te chuan Agniveer tan 10% reserved an nei vek a ti bawk.
“Naxalism la awmna district tlemte chauh a awm tawh a, inthlawpna nen Naxalism hi India atangin kan nuaibo thei ang” tiin Bhalla chuan a sawi bawk.
CRPF Director General Anish Dayal Singh chuan special medical review board din a nih thu leh an hmalakna avangin CRPF 24,000 atanga 14,000 te ‘low medical category’ a awm te chu ralthuam vuan leh thei tura fit an nih tawh thu a sawi bawk a.
“Zu ngawl vei te leh chumi kaihhnawiha rilru laa harsatna nei te tan 14 Snehalaya (conselling centres) din a ni a, chumi hmang chuan sipaite chu fit taka siam tum an ni” tiin Singh chuan a sawi bawk.
DG chuan vacancy 4,800 vel hnawhkhatin a awm tawh a ti bawk a. Kumin kum tawp rualin 11,000 personnel te Sub-Inspector te pawh telin charge an la ang a, battalion tina vacancy ruak te hnawhkhah vek a ni ang a ti bawk.
Tun hnaia CRPF nunna chan 2,046 chhungte nena inbiak pawh theihnan special drive neih a ni a. Lungawilohna 2,000 vel zingah 1,500 chu chinfelin a awm tawh a ti bawk.