Kumin May thla atanga Manipur buaina avanga nunna chan mi 175 awm tawhin hliam tuar 1,108 an awm a, an chin hriat loha bo 32 an awm tawh niin police-te chuan an sawi.
In hal 4,786 a awm tawh a, sakhua hmun 386 tihchhiatin a awm tawh tiin an tarlang bawk.
IGP (Operations) I.K. Muivah chuan, “Tun hun harsa Manipur in a tawh mekah hian mipuite kan tiam duh chu police, central forces leh civil administration chuan theih tawp chhuahin thil a pangngai theih nan a bei reng a ni” tiin a sawi a. Police station atangin ralthuam 1,359 leh a mu 15,050 kan hmu let tawh a ni tiin Muivah chuan a sawi bawk.
Buaina chhuah lai leh tharum hmanga inbeih thlen niai nuai laiin police station atangin ralthuam thahnem tak rukboin a awm a ni.
Muivah chuan in hal 5,172 a awm tawh a, chung zingah chuan sakhuana hmun 386, Biak In 254 leh temple 132 a tel tiin a sawi bawk.
“Phougakchao Ikhai, Bishnupur district atanga Kangvai, Churachandpur district danna chu hlihin a awm tawh a, national highway te pawh venhimin a awm” tiin a sawi bawk.
IGP (Administration) K. Jayanta chuan nunna chan 176 zinga pakua te chu tun thlengin tute nge an nih hriat a la ni lo tiin a sawi bawk a.
“Ruang sawmsarih pakua lak a ni tawh a, 96 lak lohin a la awm thung a. RIMS leh JNIMS hospital ah ruang 28 leh 26 dahin a la awm a, 42 chu Churachandpur hospital ah dahin an la awm thung,” tiin a sawi bawk.
Jayanta chuan case 9,332 ziah luh tawh niin mi 325 manin an awm tawh a ti bawk a. IGP (Zone-3) Nishit Ujjwal chuan NH-32 leh NH-2 te chu tha takin tlan theihin a awm mek, a ti bawk a.
Manipur-ah hian May 3 khan ‘Tribal Solidarity March’ huaihawtnaah buaina chhuakin Meitei community tena Scheduled Tribe (ST) status an ngiat avanga kawngzawhna huaihawt a ni.
Manipur-ah hian Meitei 53 per cent vel an awm a, Imphal valley ah cheng deuh vekin, tlang ramah Nagas leh Kukis 40% vel an cheng ve thung.
Manipur-ah nunna chan 175 awm tawh
Get real time updates directly on you device, subscribe now.
Next Post