Manipur-ah pawisa inchhuh luih a tam

Manipur-ah pawisa inchhuh luih a tam
Manipur police chuan thla li, November 1, 2024 leh February 23, 2025 chhungin an X-a an tar lan chinah pawisa inchhuhsakna thubuai 80 an ziak a. Myanmar bula tharum thawhna thlenna state-ah hian ruihhlo khaihhnawih thubuai 22 leh ralthuam man thubuai 12 an ziak lut bawk.
Thubuaite hi X-a an tar lan chin chauh a ni a. Hun leh hmun dangah hetiang kaihhnawih thil tam tak man leh thubuai ziah luh, social media-a an tar lan loh tam tak a awm.
Police chuan phai district-ah chuan an thil man leh thubuai ziahte hriat a awl a, tlangramah erawh inbiakpawh zung zung a har deuh niin an sawi.
Police-in X-a an tar lan chinah chuan Kangleipak Communist Party (People’s War Group)/KCP (PWG) chu mi pawisa chhuh luih leh thubuai danga inhnamhnawih tam ber an ni.
People’s Revolutionary Party of Kangleipak (Progressive)/PREPAK (PRO) chu thubuai ngah zual pahnihna an ni a. People’s Liberation Army (PLA) leh an political wing, Revolutionary People’s Front (RPF) chu pathumnaah an awm thung.
Police-in thubuai an tar lanah hian mi pawisa chhuh luih, ruihhlo, ralthuam, pawisa man, mi ruk bo, thil hal leh tum bika mi thah chauh a tel.
Tual chhunga inrawkna tenau engmah telh a ni lo va, state sorkarin opium poppy chin a khapna bawhchhia man leh thubuai siam chhiar tel a ni lo bawk.
Thla li liam ta chhunga mi pawisa chhuhsak (thubuai 80) dawta pawikhawihna tam ber chu ruihhlo tawlh (22) a ni a. Dan lova ralthuam tawlh leh ruk (12) leh mi ruk bo (pakua) chuan a dawt.
Thla li tling lo deuh chhunga police-in X-a an tar lanah hian pawikhawihna 131 tar lan a ni a. Eng ang pawikhawihna nge tih hriat loh 11 awmin pawl inhnamhnawihna 27 a awm.
PREPAK chu pawikhawih tam palina niin panga an khawih a, KCP (Noyon) leh Kanglei Yawol Kanna Lup (KYKL) chuan thubuai pali ve ve an nei.
United National Liberation Front (Pambei)/UNLF (P), Arambai Tenggol, KCP (City Meitei), KCP (Taibanganba), KCP (MFL) leh UNLF (Koireng) te chuan pathum theuh an nei bawk.
United People’s Party of Kangleipak (UPPK), National Revolutionary Front of Manipur (NRFM), leh Socialist Revolution Party Kangleipak (SOREPA) chuan thubuai pahnih theuh an nei.
United Kuki Revolutionary Army (UKRA), Volunteers Welfare, KCP (MC Progressive), KCP (MC), KCP (KK Nganba), Kuni National Army (KNA), KCP (Ibungo Ngangom), KCP (Apunba), United Kuki National Army (UKNA) leh UNLF (Ningon Macha Group) ten pakhat theuh an nei.
Mi pawisa chhuh, ruihhlo leh ralthuam kaihhnawih thubuai dawta pawikhawihna tam leh ber chu mi ruk bo a ni a. Police chuan thla li dawn chhung hian inruk bo thubuai pakua an ziak lut a ni.
Meitei hel pawl, kum 10 dawn Manipur-a che tawh lo – PLA, KYKL leh KCP te chu Myanmar atangin May, 2023 hnu lamah an lo let leh bawk a, hei hi sipai sorkarin an awmna an luah tak vanga ngaih a ni.
Manipur Police hian X-ah hian May, 2023 hma kha chuan zuitu an ngah lo hle a, tunah chuan ‘verified’ blue tick neiin zuitu 24,000 chuang a nei tawh.
Anmahni pawhin February 13-a President’s Rule-a an state dah a nih hnuah X-ah hian mi man leh ralthuam hmuh chhuah an tar lang tam sawt hle.
Governor Ajay Kumar Bhalla chuan an state-a chi leh chi inkara buaina a chhuah hnuah ralthuam rukte chu ni sarih chhunga dah kir turin mipui a ngen a, hei hi Ningani khan a tawp.
Tar lan tawh angin phaia awm Meitei leh tlangram district tam taka awm, Kuki te chu May, 2023 atang khan ram neitu nihna thilah intibuaiin mi tam tak thi an awm tawh a, pawikhawihna pawh a tam phah hle.