Manipur atanga raltlante tan sawrkarin thawhlawm khawn

Manipur atanga raltlante tan
sawrkarin thawhlawm khawn
Manipur buaina avanga Mizorama sahimna zawnga tlanlutte chhawmdawlna atan sawrkar chuan thawhlawm a khawn dawn.
Mizoram Home department thuchhuak chuan, 2023 May 3 atanga vawiin thlenga Manipur tualchhung buaina avangin raltlan thahnem takin mahni sahimna zawngin Mizoram an rawn bel a. Ei tur, in tur leh chenna tur nei loa an awm state sawrkar chuan remti loin theihtawp chhuahin chhawmdawlna tur a ngaihtuah a. FCS&CA-in buhfai quintal 2388.50 pechhuak tawhin, raltlan awmna – relief camp nei district bawrhsap-te pawhin an ei leh in tur buaipuiin sum leh tha leh zung tamtak an seng tawh a. Khawtlangin theih ang angin tanpuina an pek bakah NGO hrang hrang, mimal leh kohhran hrang hrangten tanpuina sumfai leh chawhmeh bakah bungrua an pe reng bawk a. Tunah hian heng tanpuina ring hian an la khawsa thei hram hram, tiin a sawi a ni.
Mizoram chief minister-in sawrkar laipuiah tanpuina tur cheng vaibelchhe 10 a dil mek bakah state sawrkarin vaibelchhe 5 a ruahman mek a. Hetihlai hian sum indaihlohna a nasat tawh avangin state sawrkar din – Executive Committee on Internally Displaced Persons from Manipur thukhawm chuan MLAs, corporators, sawrkar hnathawk, state PSU, Autonomous District Councils bakah Mizorama awm CPSU, central sawrkar office leh bank te hnenah an phal ang tawk tanpuina pe tura ngen nise tiin a rel tih a sawi. Hemi ang hian tanpuina hi mahni remchan ang theuh thawhkhawm turin ngenna hi siam a ni ta tih sawiin, thawhlawm hi DM&R director account no. 97014572199 IFSC SBINORRMIGB, MICR 796805005, MRB Vaivakawn Branch ah 2023 July 25 hma in emaw hemi ni thleng hian thehluh theih a ni tih Home department chuan a hriattir. Zawhfiah duh nei tan mobile no. 6009207097 ah zawh fiah theih a ni tih a sawi bawk.