Manipur buai hnu-ah Mizoramah heroin pung

Mizoramah ruihhlo a hluar a, a pung deuh deuh niin a lang; Manipur buai hnu-ah Mizoramah heroin man tur a pung a, tun hnaiah an man nasa hle.
Mizoram Excise & Narcotics (MEN) department hotute chuan Manipur buai hnu-ah heroin man tur a tam a, a pung tih an sawi.
An sawi danin, tun hnaiah heroin hi a hlawmin an man nasa a, heroin an man zat a pun nasat chhan pawh vawi khata a hlawma man a awm leh thin vang a ni. Manipur buai hnuah chutiang chu a pung tih an sawi.
June ni 11-ah khan hnam dang kut atangin Aizawlah heroin hi kg 5.810 lawih an man a, a hma ni-a an man nena belhkhawmin ni hnih chhungin kg 6.58 a tling. 2015-a kum tluana an man kha kg 4.088 a ni a, chumi hmain kg 4 an man tling ngai lo. 2012-ah te khan kum tluanin kg 1.017 an man a, 2013-ah phei chuan kg 1 a tling lo.
Tun hnaiah a hlawm tam thama man hi a awm fo; June ni 6-ah khan vairengte-ah kg 2.112 an man a, kg 1 te, kg 2 te an man fo. July ni 2-ah pawh kg 4.85 an man.
MEN department hotute chuan Mizoram leh Manipur tea lakluh heroin hi khawchhak lam, kawng thuhmuna mi a nih thu an sawi a, Manipur an buai hnu hian Manipur-ah an luhpui ngam loh avangin Mizoram lamah an rawn keng nia an hriat thu an sawi.
Mizorama heroin an manah hian Mizorama mi tur ni lo, state danga mi tur a tam tih an sawi a, tun hnaia a hlawma an man pawh hi Mizoram pawna mi tur a ni hlawm tih an sawi.
Heroin vanga an manah hnam dang an tam thu an sawi a, Mizo an mante chu thil awmze hre lo, an heroin ken pawh tu ta nge a nih hre lo, hlawh neia keng ve tawp an nih thin thu an sawi bawk.