Manipur buaiah PM Modi luhlul zel

Prime Minister Narendra Modi chu ni 40 chuang Manipur-in buai harsatna namen lo a tawk tawh chunga a ngawih reng avangin Chief Minister hlui Okram Ibobi Singh chuan PM Modi chuan Manipur hi India ramah a ngai nge ngai lo tiin zawhna a siam.
Kar kalta chhung zawng khan Manipur-a political party sawm hruaitu rual te chu Delhi-ah an inkulh tawh a, PM Modi hmuh tumin an bei a, mahse, an hmu thei lo.
“Manipur hi India ram bung nge a ni lo? India ram a nih chuan enga tinge Indian Prime Minister hian min hmuh duh loh? Prime Minister hian foreign tour a neiha ram dang mite nena inbiakna an neih hma ngeiin hmuhna hun min siamsak kan beisei” tiin Singh chuan a sawi a.
Manipur dinhmun chu a duhawm lo takzet tia sawiin mi 20,000 chuang a tam ber te hmeichhia leh naupang te chu relief camp-ah an awm mek a ni tiin a sawi bawk.
Manipur aiawha PM Modi hmuh tumte zingah hian Janata Dal (United), Communist Party of India leh CPI (Marxist), Trinamool Congress, Aam Aadmi Party, All India Forward Bloc, Shiv Sena (UBT), Nationalist Congress Party, leh Revolutionary Socialist Party aiawhte pawh an tel a ni.
June 10 daih tawh khan Prime Minister’s office ah appointment hmuh theih nan email an thawn tawh thu leh a hnuah June 12 ah ziak ngeiin an thlen leh thu sawiin tichung chuan chhanna an la hmu lo an ti bawk a.
An thil tawn mek chu June 18, 2001-a Manipur danchah nen inang reng a nih thu sawiin Congress general secretary for communication Jairam Ramesh chuan khatih laia BJP sorkar Atal Bihari Vajpayee kaihhruai chu a tha zawk a ti a. Manipur-a tharum thawhna thlen atanga ni ruk chhungin Vajpayee chuan June 24, 2001 khan all-party delegation te a hmu hman a ti a. July 8 ah khatih laia Home Minister L.K. Advani chuan palai rualte chu a hmu leh a ti bawk a. Khang hunah khan Vajpayee chuan buaina a reh theih nana insumkarna nei turin ngenna siam a ni a ti bawk.
“Vawiinah erawh party sawm aiawh ten PM Modi hmuh an tum a, a ngawi reng” tiin Ramesh chuan a sawi a. Hei bakah hian Home Minister Amit Shah-an Manipur a tlawh tawh chungin hmasawnna a awm thei lo chu pawi a tih thu a sawi bawk a. Congress leader chuan Modi chu Vajpayee anga chet la tura ngenin palaite chu hmu turin a ngen a. PM ‘Mann ki Baat’ aiin ‘Manipur ki baat’ kan mamawh a ti bawk a.
“RSS ideology leh BJP politics avangin Manipur a buai mek a ni” tiin a sawi bawk.