Manipur buaina ‘humanitarian problem’: SC “ST puang theitu chu President a ni”

Supreme Court chuan May 8 khan Manipur buaina chu ‘humanitarian problem’ tiin a sawi a; chutihrualin community-te Scheduled Caste emaw Scheduled Tribe-a puang theitu chu High Court ni lovin President zawk a ni, a ti bawk.
“Mipui leh bungruate humhima thil a pangngaia a awma theih nan chiang takin kan ngaihpawimawh kan sawi tawh a. Hei hi humanitarian problem a ni a. Nunna chan leh bungrua hlohte kan vei takzet a ni,” tiin Chief Justice of India D.Y. Chandrachud chuan Centre leh Manipur sorkar aiawha ding Solicitor General Tushar Mehta hnenah a sawi.
Court chuan Centre leh Manipur sorkar chuan in leh lo chhuahsana relief camp-a awm te hnenah ni tin mamawh pawimawh eitur leh damdawi an pe ngei tur a ti bawk a. Damdawia enkawlna mamawhte chu Army emaw hospital remchangah dah tur an ni, tiin court chuan a sawi bawk.
Bench chuan sorkar chu ‘in leh lo chhuahsan hial tena an let leh ngei theih nan’ hma a la tur a ni a ti bawk a. “Hei hi ngaih pawimawh ber a ni” tiin Mehta chuan a chhang bawk.
Court chuan Mehta thu theh luh ‘March 27, 2023-a Manipur High Court Single Judge in thupek a chhuah bawhzui a ni’ a tih chu a chhinchhiah bawk a.
“High Court hnenah hian Constitution bench judgement awm tawha High Court-in thuneihna a neih lohzia in hrilh tur a ni a. Scheduled Caste emaw Scheduled Tribe-a puan hi President thuneihna a ni,” tiin Chief Justice Chandrachud chuan senior advocate Sanjay Hedge, original petitioner, March 27 a Manipur High Court in thutlukna a siam phahna chhan aiawh hnenah chuan a sawi bawk.
Manipur Legislative Assembly member Dinganglung Gangmei, Chairman of the Hill Areas Committee (HAC) chuan apex court-ah High Court thupek chu Manipur-a intihbuaina chhuah chhan tiin a sawi a.
Senior advocate Colin Gonsalves, Gangmei leh Manipur Tribal Forum aiawha ding chuan in leh lo chhuahsante humhim an ngaih thu a sawi a. “Chu chu kan mawhphurhna zinga tel a ni,” tiin Mehta chuan a chhang a.
Solicitor General chuan tun hnai ni hnih chhungin tharumthawhna a awm tawh loh thu sawiin court chuan State-ah thil a pangngai hun nghak se, a ti.
Court hnenah Central Armed Police Forces 52 leh Army/Assam Rifles columns 105 tirh luh an nih thu a sawi a. Buaina chuahna hmunah flag march neih a nih thu sawiin State sorkar chuan retired police officer chu security advisor ah ruatin Centre pawhin Manipur Chief Secretary turin senior officer a tir haw tiin sawi bawk a.
Tun ni hnih chhungin darkar tam tak chhungin curfew thlahdul a ni tawh a, peace meeting neih niin buaina chhuak thei ven a ni a ti bawk a. Helicopter leh drone te chu patrolling nana hman a ni a ti bawk a. Mehta chuan relief camp te pawh in leh lo chhuahsante awm nan leh enkawl nana hawn a ni a ti bawk.
“Army, paramilitary forces te leh agency dangte chuan hnathawkin an hlawhtling hle a. Thil a pangngai tawh a ni” Mehta chuan a ti.
Court chuan Centre leh State te chu May 17-a hearing neih leh hunah status report pe turin a ti a ni.