Manipur buaina leh a behbawm…

Manipur sawrkarin Manipur chhunga district pathuma Zo hnahthlakte awmna hmun hrang hrang reserve forest area-a a puan avang leh, Meitei ten Scheduled Tribe (ST) nih tuma an beihna nghawng kal zelah, buaina a punlun zel a, nunna hialin a tuar ta a.
He buaina thleng chungchangah hian Mizoram chief minister Pu Zoramthanga chuan Manipur chief minister Pu N. Biren Singh hnenah lehkha thawn nghalin Manipura tharumthawhna thleng mek chu hmet mit tura ngenin, a tul anga thawhpui a inhuam thu a hrilh nghal a.
MZP lam pawhin Manipur-a Zo hnahthlakte thlavang a hauh a, Central YMA pawhin boruak ti sosang zawnga hma la lo turin Mizo mipuite ngenna thu a chhuah ve nghal a; Manipur-a chi leh chi inkara buaina thleng mekah Mizoram sawrkar leh Central YMA hmalakna ngaichang thiam turin Mizo mipuite an ngen a ni.
Hetiang buaina a thleng hi a pawiin a vanduaithlak hle a. State danga kan Zo hnahthlak puiten harsatna an tawhin, Mizoram mipuite kan awm hle hle thei lo va, chutih rualin state dang daiha thil thleng a nih avangin a pawng ataka lo inrawlh ve ngawt a remlohna a awm thin a; hetiang hunah hian sawrkar leh pawl hrang hrangte hmalakna ngaihchan thiam a pawimawh hle.
Hetih lai hian, Mizoram chhunga khawsa mek Meitei-te chunga tute emaw rilru fim pu hleithei lo khawpa thinrim inthunun thei loten kut an lo thlak palh pawh a awm theih awm e. Chutiang chu a thlen palh loh nan thu maia inngen liam mai lo va, mit len ngun tur leh, hetiang hunah hi chuan pawnchhuak tam lo tura inhrilh hialte pawh a tulna chin a awm thei awm e. Thuneitute hmalakna ngaihchan thiam hi a him ber a ni.