Manipur buainaah Meitei-ten ASP kut thlak

Manipur buainaah Meitei-ten ASP kut thlak
Meitei pawl, Arambai Tengol-in shutdown an puan mek thlawptute kut an thlakna nia sawiah Thawhtanni khan Nambol Thongkha, Bishnupur district-ah additional superintendent of police (ASP) leh police dang pahnihin hliam an tuar.
He thil hi Arambai Tengol-in ni 10 chhung shutdown an puan mek kal mek laia Tiddim Road (NH-150)-a police an patrol-naa thleng a ni.
Shutdown hi phaizawl district hrang hrangah Inrinni atang khan kalpui niin Arambai Tengol hruaitu, Asem Kanan tela an mi panga man an nih duh loh lantirna a ni a. Kanan-a hi Central Bureau of Investigation (CBI)-in Bir Tikendrajit International Airport, Imphal-ah Pathianni khan man a ni.
Man an nih hnuah hian phaizawl district – Imphal West, Imphal East, Thoubal, Kakching leh Bishnupur boruak a tang hle a. Man duh lotuten kawngpui lian dangin lirthei ke leh thing tum an hal a, thil dang pawh halin lirthei kal a buai phah hle.
Police-te chuan Additional SP Wangkhomba Okramcha-a hi Nambol atangin Bishnupur panin Tiddim Road an zawh a, district SP pawhin tawiawmin shutdown kalpui meka dan leh thupek kenkawh dinhmun thlithlai an ni tih an sawi.
Nambol Thongkha an thlen hian lungawi loten kawng an lo dang a, lunga an vawm bakah sairawkherhin an perh bawk niin an sawi.
Mipui chetna chu khap daih tum a ni a, “Additional SP pawh a lirthei atanga chhukin dawr a tum a; mahse, tharum thawhna a lo chhuak thut a, amah a zuitu pakhat chu an khawih ta mai a ni,” tiin officer pakhatin a sawi.
An buainaah hian additional SP hi a tlu a, an bei zui a. A zuitu hian a lu-ah hliam a tuar bawk a, lunga vawmna nia hriat a ni tih a sawi.
Mipui pungkhawm hnawh darh nan hian police chuan tear gas shell tam tak, mock bomb leh silai an hmet puak puak niin a sawi.
He thil thlengah hian thubuai ziah luh niin chhui zui mek a ni a, a titute pawh man ngei tum an ni tih police chuan an sawi.
Police-te silai pai lai chhuhsak an tum nia sawi awm chungchangah police hian an innawr buainaah a paina atangin a tla tih an sawi a. Nambol-a cheng nu pakhatin Nambol police station-ah a hlan let leh tawh tih an sawi bawk.
Tar lan tawh thin angin May, 2023 atanga Manipur-a hnam hnih, Meitei leh Kuki inkara buaina chhuakin reh lam a la pan thei lo va. Tun tuma thil thleng pawh hi hnam hnih intihbuaina kal zelin a hrin a ni.