Manipur buainain Mizoramah BJP a nghawng

Manipur-ah Zo hnahthlakte leh Meitei an indo a,
hei hian Manipur chauh ni lovin Mizoram pawh a nghawng. Mizoram a nghawng dan hi sawi tur a awm nual ang a, politics pawh a nghawng- Mizoramah BJP-in an tuar.
BJP, Mizoram Unit president Vanlalhmuaka chuan Manipur buaina hian Mizoramah an party a nghawng tih a sawi a, mahse a reh leh tawh niin a sawi.
“Manipur buaina hian min nghawng a, mahse a reh leh tawh. A tir lamah khan min nghawng a, a ziaawm hret hret ta a,” a ti.
State Executive Committee-in Manipur sorkar an dem thu an pass tih a sawi a, Manipur-a Zo hnahthlakte lama an tan thu sawiin, tunah chuan Manipur buaina chungchanga BJP demna kha a reh tawh niin a sawi.
Mizoram politics-a pa lian, a then phei chu MLA ding lai, mi pathum pali, BJP zawm tura ngaih, zawm ta lo an awm a, BJP president chuan hei hi Manipur buaina nghawng a ni lo niin a sawi; “Hei hi Manipur buai nen a inzawm lo, thil dang vang a ni,” a ti.
MLA ding lai pakhat, a hming tarlan rem lo chuan, “Tun ang hunah BJP-a luh chi a ni lo, Manipur buai vang hian mipuiin an dem alawm,” a ti ve thung a, BJP-a luh tum, ip leh deuh an awm nia a hriat thu a sawi.
Manipur buainain a nghawng leh nghawng loh chu thuhran ni se, term kal meka MLA pahnih, Lalrinliana Sailo leh Dr K Beichhua te chu inthlan lo awm turah BJP candidate an ni dawn a, “Aigupta ramah Josefa kha supply minister a nih a ngai a… BJP-a voice neih hi a ngai,” a ti.