Manipur CM-in kan CM a be duh lo – Deputy chief minister

Manipur CM-in kan CM a be duh lo
– Deputy chief minister
Manipur buaina kal zelah ruahmanna siam tuma Mizoram chief minister-in phone hmanga biak a tumna chu Manipur chief minister chuan a la duh lo thak niin deputy chief minister Tawnluia chuan a sawi.
Zirtawpnia MNF office-a inkhawmah MNF senior vice president ni bawk Tawnluia chuan Meitei hoin Zofate chenna ram luahlan an tum a, chief minister Pu Zoramthanga’n Union Home minister biain, Mizoram Home minister pawhin biak theih ang ang a be bawk a, kan CM be turin ruahmanna an siam a, Manipur CM chuan Mizoram CM chu lo be duh loin phone call a la duh lo thak a. Mahse, a theih dan danin hma an la a, CM hian MLA Dr L Thangmawia chu Manipur-ah kaltirin huaisen takin an ei leh in tur a han pe tih a sawi.
“Zohnahthlak unau zawng zawngte hi kan thlahthlam thei lo a. Mizo Hnam Run kan tih hi vawiinah hian a nihna hi a chiang tulh tulh a, nationalism-ah hian kan intuai thar lehzual a ngai. Kalphung thar ti hian an sawi ve em? Keini chuan nationalism kan hmachhuan a ni,” a ti.
Burma lam Chin unauten chaw an nghei tur a ni lo, tiin central-in a remti lo chung tanpuina pein, naupangte tan sikul kalna thlengin Mizoram sawrkar chuan a lo buaipui thu te; Bangladesh atanga Zohnahthlakte rawn luh tum chu BSF-in lo dang mah se, kan unaute an ni e, tiin kawng dangin an lo luh dan sawrkarin a dap ngar ngar tih te a sawi bawk.
Chief minister chuan hmunhma hmingah Mizo hruaitu hmasa Pu Ch.Chhunga te, Pu Ch. Saprawngate leh midang hrang hrang hmanga a phuah ngat mai te chu a fakawm tih sawiin, ama (Zoramthanga) hming leh minister dangte hming pawh hman phalloin, kan mi hmasate kan chawimawi a ngai a ni, a ti tlat te chu a puitlin zia tilangtu a ni tih a sawi.
MNF chu Mizorama hun khirh leh harsa kan tawh laia rorel turin Pathianin a ruat tih a chiang tawlh tawlh tih Tawnluia hian a sawi a. Sawrkar hmasaah Mautam tam laiin chaw nghei mai te a hlauhthawn awm laiin, a thlawnin buhfai an sem thei hial tih a sawi bawk/
CADC inthlanah sawrkarna siam turin MNF-in ‘chance’ a nei tha ber tih MNF hruaitu hian a sawi a. “CM-in hnehna mawi tak min neihpui hi lawmpuina chibai kan buk a ni,” a ti.