Manipur-in EGI report Court- ah khing

Supreme Court chuan September 6 khan interim order tichhuakin Editors Guild of India (EGI) president leh senior journalists pathum te chu Manipur Police tena Manipur buaina an report-a ‘bias’ a tihah man an tum lakah a humhim.
Chief Justice of India D.Y. Chandrahcud kaihhruai three-judge Bench chuan September 11 ah kimchang zawka ngaihtuah a tum thu sawiin chumi hma chuan Manipur police te chu chet la miah lo turin a ti nghal a.
Senior advocate Shyam Divan EGI aiawha ding chuan Chief Justice Bench hnenah September 2 a report tihchhuah hnuah Manipur police te chuan FIR pahnih an ziak lut tawh tiin a sawi a.
FIR hmangin EGI president Seema Mustafa, Sanjay Kapoor, Seema Guha leh Bharat Bhushan te chu Indian enal Code hmangin thubuai siamsakin EGI report chu ‘thudik lo leh dawt phawhchuap’ an tihsak tiin a sawi a.
Divan chuan heng report-te hi fact-finding team tena Manipur hmun hrang hrang tlawha a tuartute leh mita hmutute August 7 leh 10 inkara an kawmna behchhana siam a ni tia sawiin report chu a dik thlap a ni a ti bawk.
GI te chuan report tihchhuah hnua Manipur Chief Minister Biren Singh thuchhuah chuan journalist te right to freedom of speech leh personal liberty te derthawngah a siam a ti bawk a.
EGI report-ah hian hnam anga intihbuainain media nasa taka a thendarh dan tarlan a ni a. “Ethnic violence chhuah laiin Manipur journalist te chuan none-sided report an pe a ni. Hun pangngaiah chuan cross-checked neiin chu chu editors emaw chiefs of bureau ten local administration, police leh security forces te hmangin an enfiah leh thin a. Mahse, chu chu buaina chhuah avangin kalpui theih a ni lo” tiin report chuan a tarlang.
Manipur aiawha ding advocate Kanu Agrawal chuan Bench chu Thawhtanni emawah ngaihtuah nghal turin a ngen a. Chief Justice chuan kar li emaw hun pek phawt a tihzet hnuah September 11 a ngaihtuah turin a ti leh ta a ni.