Manipur kawngpui dangchat leh tan mek

Manipur tribal body te chuan Dimapur-Imphal National Highway -2 chu Thawhtanni zing atang khan an danchah leh thu an sawi a. He kawngpui danchah hian Meitei te chenna valley area a tibuai leh viau tura ngaih a ni.
Committee on Tribal Unity (COTU), Kangkokpi te chuan thuchhuah an siamah kawngpui danchah an tumna chhan hi Governmnet of India-in Kuki-Zo community te a humhim theih loh avang tiin ‘hill district-ah bungrua mamawhte zalen takin a thleng ve thei lo’ an ti bawk.
Mahse, Manipur Police te chuan X ah thung chuan, “NH-2 ah essential items phur vehicle 163 a tlan mek a. Heng vehicle te zalen taka an tlan theih nan security convoy pek an ni” an ti ve thung.
Kar kalta khan Naga te tamna Ukrul district-ah Kuki-Zo village volunteer pathum te chu thahin an awm a ni.
Hetih lai hian senior government official te chuan Churachandpur leh Tengnoupal supply na ber chhim lam kawngpui chu Meitei group ten an an dangchat an ti ve bawk a.
August 19 khan Assam Rifles convoy Imphal atanga chhuakte chuan Kumi te tamna Churachandpur-a naupangte tana vaccine an phurh chu an kalpui thei lo va, hei vang hian chopper hmangin damdawi te hi phurh zui a ni.
Hei bakah hian tribal te awmna Kangpokpi leh Senapati district a medical supply pek luh tum pawh Sekmai-ah August 18 khan danchah a ni bawk a. Police-te inrawlhin mipui thinrim tena damdawi an tihchhiat turte erawh humhim a ni tia sawi a ni bawk.
Manipur hi May 3-a Kuki leh Meitei community te inkara buaina in a la chiah reng a, nunna chan 160 chuang an awm tawh a ni.
COTU te chuan Home Minister Amit Shah chu Lok Sabha-a a thusawi hnukkir tura ngen bawkin Amit Shah chuan Myanmar atanga Kuki lut ten buaina an siam a ti a ni.
Senior police official te chuan tribal body te chu kawngpui danchah titawp turin an ngen a, “Vehicles ten buaina an tawh loh nana ruahmana siam a ni a. Assam Rifles convoy ten Pathianni khan Churachandpur an thleng a, medicine te pawh Inrinni khan thlen a ni a. Kawngpui danchah a tulna chhan a awm lo,” tiin official te chuan an sawi.
Kaawngpui danchah hi July 3 khan tribal body leh Kuki hel pawl Centre nena peace pact siam tena inbiakna nasa tak an neih hnuah hawnin a lo awm tawh a ni.

Supreme Court
Hetih lai hian Supreme Court chuan Manipur violence avanga tuartute chhawmdawlna tur kalpui dan enfiah turin Justice Mittal panel rawtna te tha zawka an kal dan turah thupek a siam dawn a.
August 21 khan Supreme Court chuan Judge Gita Mittal kaihhruai panel tena Manipur-a hmeichhiate laka hleilenna chungchanga report pathum an thehluh chu lawyer te hnenah an hlan a.
Committee chuan Manipur a ethnic violence tuartute chuan document pawimawh te an hloh tia sawiin hei vang hian a thar pek tur a ti bawk a.
Apex Court chuan high court judges hlui — Justice Gita Mittal, former Chief Justice of Jammu and Kashmir High Court, Justice Shalini Phansalkar Joshi, former Judge of the Bombay High Court leh Justice Asha Menon, former Judge of the Delhi High Court te chu May 4 hnua Manipur buaina avanga hmeichhiate laka hleilenna chhui chiang turin a lo ti tawh a ni.
Panel member te hi hmeichhia vek an ni a, “Committee huam zau tak a ni ang a. Chhawmdawlna kalpui theih dan tur te, chenna In, sakhaw biakna hmun leh tanpuina kalpui dan tur leh thil dang dangah te rawtna an siam ang” tiin CJI Chandrachud chuan a lo sawi tawh bawk.
Hei bakah hian a hmain Supreme Court chuan National Investigation Agency, Intelligence Bureau leh Nagaland a thawk tawh retired Maharashtra cadre IPS officer Dattatray Padsalgikar chu Manipur a FIR 6,500 chuang chhuichianna enfiah tura an ruat mai theih thu a lo sawi tawh bawk a ni.