Manipur lakah Mizoram an tlawm

February 29, Ningani khan Yupia, Arunachal Pradesh-ah FIFA Santosh Trophy 2023-24 khelh chhunzawm a ni a. Inkhel ngaihven hlawh takah Mizoram chu an elpui lian Manipur lakah 4-1 in an tlawm. Mizoram hian an match hnuhnung berah Railways an hmachhawn dawn a, an chak a nih chua quarter-final a la lut thei dawn.
Yupia a Golden Jubilee Stadium-ah hmarchhar derby en turin Mizoram leh Manipur tantu tam tak an pungkhawm a. Mualchhungah an inkhelh hma hauh atangin khelmual chhung boruak a sang a, entu mipuite an inau el nghal. Hmun hrang hranga awm Mizote pawhin Manipur nena inhmachhawn tur hi an ngaihven thup bawk. Inkhel ngaihven hlawh takah Mizoram in beisei an phak lova, Manipur lakah chhuanlam siam theih lek lovin an tlawm.
Inkhel tan phat atangin Manipur in Mizoram an nawr nghal chat a, Mizoram tlarhnung an chhaihbuai nghal chat. Mizoram an insiamtha hret hret a, ball chang tam zawkah an tan laiin Manipur tlarhma hlauhawm tak tak an dang zo lova, goal an chhuah ta nge nge. Mizoram tlarhnungin an theih fai theih loh chu Sangkar Singh chuan minute 9-naah chiang zetin a pet goal a, Manipur hmahruaina goal a thun. He goal hian Mizoram a chhaihkawlh a, an khingpuite nawr tlangin goal an thun nghal teuh hle. Hnai te atanga an hun tha neih chu uiawm takin an hlah a, an si phurh an sut thei lo.
Mizoram tana fehchhuak player te hian Manipur laka tlawm chu thih hreh takin an hreh a, chak tumin an theihna zawng zawng an hlan. Ball chang tam zawk an ni chho ngar ngar a, goal hlauhawm pawh an nei thin. Hlauhawm taka chantir a, goal thun theihna hial tur pawh ball an dawn fuh tawk loh vangin ho lamah an chhuah fo a, an si phurh an sut mai thei lo. Mizoram tlarhmate an chet fuh hleih theih loh laiin Manipur tlarhmate erawh an hlauhawm reng a, an nawr let a hlauhawm thei hle. Chawlhlawk dawn hnaih minute 35-naah fuh zet an khingpui tlarhnung an thiah hnuin inelna neih meka goal 8 thun tawh Phijam Sanathoi Meetei chuan fuh takin a pet goal a, an goal hnihna a thun. He goal a luh hnu hian goal dang a luh belh thei tawh lova, si hnih faia hmahruai chungin Manipur in chawlhlawk an hmang.
Chawlhlawk hnu lamah forward tawnhriat ngah, Mizoram tana thahnem ngai em em thin Malsawmfela luhtir a ni a, Mizoram tlarhma te an hlauhawm sawt. Sawmfela hian an khingpui tlarhnung te thlamuangin awm tir thei lo mah se uiawm takin ball a hloh a, a ball hloh kal zelah Manipur in goal an thun. Manipur hian chiang zetin Mizoram tlarhnung an thiat nawn leh a. Renedy Singh chuan minute 56-naah awlsam takin a pet goal a, an goal thumna a thun.
Si thum fai ngawta an hnufual vangin Mizoram tan thawhchhuah a harsa tawh dawn a, social media lam atanga entute an beidawng tawh hle. Hetihlai hian a hmuna entute erawh an hnualin, an beidawng ve mai lova, ‘Mizoram tan fan fan’ tiin ring takin an au zui zel. He rawl mawi hia mualchhunga player te a fuih phur a, chak duhna lian zawk a neih tir. Inelna kal meka chetha tak Malsawmzuala Tlangte chuan minute 84-naah mawi zetin a pet goal a, an si phurh a sut then. He goal hian team a fuih phur a, Mizoram hi an hlauhawm zui viau naa an vanneih ni a ni lo thung.t
Mizoram an vanduai chhoh zel laiin Manipur an vannei a, hun tha an nei zui leh. Manipur goal hnihna thuntu Phijam Sanathoi Meetei chuan minute 90-naah an goal lina thunin an chakna a nem nghet. Hun tawp thlengin goal dang a luh belh tawh lova, senior player thenkhatin an kaihhruai rawlthar player tha za rual Manipur chuan 4-1 ngawtin an elpui lian Mizoram an sawp a, Group B atanga quarter-final lut hmasa ber an ni nghal.
Group B-ah Manipur hian khelh li atangin point 10 an hmu a, khelh khat khelh hmabak an la nei chungin quarter-final an lut chiang tawh. An match hnuhnung berah Delhi an hmachhawn leh dawn a, Delhi lakah hian an player thate an hahdamtir a rinawm.
Manipur an tlang chian tawh laiin Mizoram hi tla thei dinhmun him lo takah an ding thar thung. Railways hmachhawn zui leh tur Mizoram hian khelh li atangin point li an hmu mek. Quarter-final lut thei turin March ni 2, Irinni a an khingpui tur Railways an hneh ngei ngei a ngai tawh. Thih leh dam kara leng an nih tawh vangin Railways lakah Mizoram hian an theihna sang ber an hlan a ngai dawn a. Chak turin vanneihna an mamawh tel a rinawm.
Mizoram hmachhawn leh tur Railways ian Ningani khan an khingpui Karnataka chu si khat faiin an hneh a, khelh li atanga point ruk hmuin, pahnihnaah an inhlangkai. Point ruk an hmu tawh vangin quarter-final lut chiang turin Mizoram hi an tan draw a tawk. Hei vang hia an goal venhim an tum dawn a. Mizoram tan hna a hautak phah ngei ang.