DR. C. Lalrampana
-- Advertisement --
A KAMKÊUNA
Power & Electricity Department hi kum 1975 khan State PWD hnuaia Superintending Engineer nen din a ni a, kum 1980 tir lama a inthen thleng khan Circle siam hma hian power tihhmasawn leh Mizoram chhunga a sem darh dan kaihhnawih zawng zawng chu Assam-in a enkawl vek a ni. State Electricity Board (ASEB) chu March, 1975 thleng a ni a, Department hian kum 1983 khan Chief Engineer post siamin directorate level (full fledged) dinhmun a luah a ni. Kum 2008 khan Engineer-in-Chief hna hi Department Head atan siam a ni a. Department hi integrated utility angin a thawk a, Mizoram state chhunga electric power supply siam chhuah, transmission, distribution leh despatching-ah mawhphurtu a ni. Mizorama power supply tling leh rintlak peknate bakah Power Distribution Network tihhmasawn, leh enkawl hna a thawk bawk. Kum 2011 Census-a state pakhatin a hman zat chu 219 kWh a ni a, tunah hian Department hian category hrang hrang hnuaiah consumer nuai 2 vel a service mek a ni. SHP atanga state ta generating system installed capacity zawng zawng chu 29.35MW a ni a, Bairabi-a Thermal Plant capacity chu 22.92 MW a ni a, hei hi standby supply atan dah a ni. Department-a administrative head chu Secretary (Power) a ni a, Department-a technical head chu Engineer-in-Chief a ni a, Chief Engineer number 4-in a pui bawk. Tunah hian Circle 9 (Electric Inspectorate leh ZEDA-Zoram Energy Development Agency telin), Division 20 leh Sub-Division 51 a awm mek a ni.
ENGNGE AN TIHTUR CHU?
Mihringte hian khuarel chhiatna (natural disaster) thilsiam chhunga thil thleng rang tak leh rapthlak tak thlipui,, tuilian, tuifawn, leimin, tlangkãng, lirnghing, ruahpui vanawn, vur tawlh lei chim, tuilian, tek tla, rial tlate hian a tlangpuiin chhiatna nasa tak leh thihna tam tak a thlen thin
Mizoramah hian mihring siam chawp (man made disaster), chhiatna kan tawh thin a awm a, chungte chu dan bawhchhiatna, lirtheia chetsual, kangmei, civil disorder, firfiak, indona, biological/chemical threat, cyber-attack, etc. te hi a ni. Abikin kangmei hi kan siamchawp tawrh zin ber pawh a ni a, chumi zingah pawh chuan in kâng hi kan tuar nasa bik a ni. Mihring, ranvulh lai kang hlum leh inchhung bungrua man tam tak tak a kangral bawk thin. A bikin in kang avanga chhiatna hi kan tawk zing hle tawh a, a kan chhan hriat loh, rinthua sawi a tam hle thin. In neitute awm loh laia kang hian electric kalsual vangah an puh deuh vek a, mahse, hei hi a dik vek thei lo. Chuvang tak chuan P&E Department hian tun atang chuan in kâng apiangin Electricity kalsual an puhna hi a hmunah kalchilhin finfiah (spot verification) la zat zat tawh se, an puhna a dik loh chuan an phu tawk hremna pe thin se a tha ngawt ang. Mipui zingah P & E deparment hriat loha a ruka mahni inthiam chawp chunga eng pawh ruk (Stealing electricity) ching, mahni eng pawh tam zawng mil lo lutuka eng hman (consume) ching an awm thin niin a lang. Entir nan-ar vulh, vawk vulh leh ran dang vulh, puantah, pangang khawi thin thenkhatte’n power an pawt ru duh fu! Heng eng pawh ruk chingte hian Miniature Circuit Breaker (MCB) an hmang ngai lo a nih chuan an eng chhit sa lutuk avangin electric short a awm thin a, hei vang hian ar in, vawk in, ran in atangin kang mei a lo chhuak thin a ni. Tin, hetiang bawk hian LP Gas Put ru avanga in kang sawi tur a awm zauh bawk. Hengte nen lam hian hian chhiatna thlen chhan hi dik taka finfiah thin ni se, mipuite pawh tun ai hian kan fimkhur zual sauh ngei ang.
A TLÃNGKAWMNA
Sorkar hi chhungkaw lianpui ang a ni a, mipui chhiah pek atanga innghat ve mai a ni. Tuna electricity bill thar pawh hi mipui tana phurrit tak nia a lan laiin eng chhit man a bat nasatzia hriat chian chuan a baa eng min chhittirtute hian min tihtawpsak mai ang tih hlauhthawnawm tak a ni. Tualchhunga power kan siam chhuah ve lah chu a bei tham nasa mai si a. Tui emaw, kawlphetha emaw pawh ni se, tariff ang thlapa kan hman ral (consumed) mil thlapa chawi hi tuma tan a na lova, Local Tv bill; chanchinbu man pawh kan duhthlanna mila chawi na kan ti ngai lo. Mipuiin hriat thiam harsa an tih leh an sawisel thin zawk tak hi chu kan hman man hlut zawng aia uchuaka sang leh tam metre reading awm mumal mang lova ral khat bill awm thin anga lang hi a ni zawk. Sum hlutna tlahniam zelah tariff thar pawh siam ve zel a ngai thin. Mahse, tariff hlui emaw, a thar emaw pawh beh chhan se, a bill-a dik thlap thlap thin se phun leh chiar a awm lo ber ang. Mipuite pawh hian chhiah hrang hrang pekah thahnem ngai thar ila. Sorkar leh mipuite hi innghat tawn (interdependent)-a nung, inawi nung tawn kan ni tih hi kan hriar chian a pawimawh hle. I sum/pawisa no kha uluk takin chhinchhiah thin mah teh. I hman tawh hnu kha a kual a kual a, engtik hunah emaw chuan pakhat tal chu i kuta a lo luhleh hun a awm thin. Hetiang chiah hian Sorkar leh mipuite hi kan inkar a hla lo, sorkar kan pek chang a awm a; sorkar paw’n min pek cchang a awm bawk a, kan inpektawn vanga khawsaho thei mai zawk kan ni e. “Thir a lin laiin deng rawh” tih thufing ang khan sawisel hun hawn lai khan sawisel duh si lo; thir lin tawh loh hnuah den nem tum leh si ang maia a sawt tawh loh hnua Rihdil kam uchang hram leh chiam chiam si hian awmzia ruai a nei thin lo niin a lang. Electric connection load san zawng aia uchuaka tam power hmanga kangmei chhuah thinte pawh hian an load tam zawng milin bill siambelhtir ngam mai se, electric fitting pangngai thlapin tihtir bawk thin se, tun ai hian kangmei avanga chhiatna hi a tlem zawk ngei ang.