Manipur Zofate tan CM-in palai hna a thawk – MNF

Manipur Zofate tan CM-in
palai hna a thawk – MNF
Manipur buainaah sawrkar laipui leh Zofate inkarah Mizoram chief minister chuan palai hna thawkin ruahmanna a siampui thin tih MNF party chuan an sawi.
MNF Media & Publicity sawi danin, Manipur buaina avanga hnam tana martar-te vuina hun, Indigenous Tribal Leaders’ Forum (ITLF) in urhsun taka buatsaih a tum chu Mizoram chief minister Zoramthanga thurawn leh ngenna avangin thulh a ni tih an sawi a. Martar-te vuina hun buatsaih tum a nih avang hian Zofate leh Meitei inkarah a ruka inep tawnna boruak lian tak awmin, an karah sipai an awm bawk nen, nunna tam tak chan belh thei dinhmunah dingin, silai pawh a puak hman hial tih an sawi.
Ministry of Home Affairs pawhin boruak thalo zawk a thleng thei tih hriain lamkal a tir a, martar-te vuina hun hman tum chungchangah sawrkar laipui aiawh leh ITLF aiawhten August 2 khan tum hnih meeting neiin, sawrkar laipui aiawhte hian mitthite vuina hun sawn turin ngen mah se, an ngenna hi an tihhlawhtlin sak nghal chuang lo tih an sawi a ni.
Union Home minister Amit Shah ngenna angin, Manipur leh Mizoram hnaiha awm Assam chief minister Himanta Biswa Sarma chuan August 2 zan khan Mizoram CM hi biain, ITLF hruaitute hnenah mitthite vui hun sawn tura ngenna thlen turin a rawn ngen a. Pu Zoramthanga hian Central YMA hruaitute chu ITLF hruaitute dawr dan turah ruahmanna a siampui hnuah August 2 zan vek hian ITLF hruaitute hi a bia a, sawrkar laipui ngenna chu ngaihthlak sak phawt tha a tih thu a rawn a. Sawrkar laipui chu Manipur buaina chungchanga thu thlente ngaihtuah saktu tur leh solution tha zawk an beisei mekte ngaihtuah saktu tur an nih avangin an duh ang tihsak phawt a him rih a rin thu ITLF hruaitute a hrilh tih a sawi a ni.
Buaina nasa zawk thleng thei reng leh nunna tam tak chan belh theihna boruak awm karah Mizoram chief minister ngenna anga ITLF-in central lam ngenna an remtih tak avangin Union Home ministry lam pawh an lawm hle tih MNF Media & Publicity general secretary VL Krosshnehzova chuan sawiin, “Mizoram mai ni lo, khawvel hmun hrang hranga Zofate tana ding tlat thin, Manipur Zofa hnam hruaitute pawhin ‘pa’ nih tlinga an ngaih, a thurawn leh ngenna pawm tlaka an ngaih Pu Zoramthanga kan nei hi MNF party chuan chhuanawm kan ti a; hnam tana ding ngam, ram hnam leh sakhaw thilah chuan a dinna sawhsawn mai mai ngai lo, ram leh hnam thatna tura principle nghet tak nei chief minister kan nei hi lawwmawm kan tiin kan chhuang takzet a ni,” a ti.