Manu leh Neeraj an ‘innei’ dawn em ?!

Manu leh Neeraj an ‘innei’ dawn em ?!
Tunhnai mai khan social media lamah Paris Olympic double medallist Manu Bhaker-i nu Sumedha leh javelin star Neeraj Chopra-te inhmu lai video a darh chiam a, India mipuiin Olympic medallist pahnihte hi fiamthuin an dembel nghal luai luai a, he boruakah hian champion shooter Manu pa Ram Kishan a rawn tawngchhuak ta nge nge a, an fanu pasal neihtir lam an la hawi lo tih a sawi.
Kishan chuan, “Manu hi a la naupang deuh mah mah a, pasal nei rual pawh a la ni lo a, tun dinhmunah chuan inneih lam kan la ngaihtuah lo,” tiin Dainik Bhaskar newspaper a hrilh.
A nupui leh Neeraj inbiakna viral video chungchang tarlang telin Ram Kishan chuan, “Neeraj hi Manu nu chuan a fapa ang maiin a en a ni,” a ti bawk.
Neeraj-a patea pawhin social media thawnthu hi chaw tak khuka khukpui chi a nih loh thu a chunga chanchinbu tarlan kaltlang bawk hian sawichhuak ve tawh bawkin, “Neeraj hian ram tana medal a hlawhchhuah ang bawkin a nupui chungchanga thudik pawh hi ram pumin kan hriat a la ngai tho tho dawn a, nupui a neih dawn hun chuan mi zawng zawngin an hria ang,” a ti.
Paris Olympics women’s 10m air pistol leh 10m air pistol mixed team event atanga bronze medal ve ve latu Manu Bhaker leh a title kawl lai humhim zo loa javelin throw silver medal awrhtu Neeraj Chopra-te hi han dem fiam remchang lehzual turin Haryana lam mi ve ve an ni.
Pistol shooter chungchang bikah a coach Jaspal Rana chuan thla thum a chawlhhahdam tur thu a sawi a, chuti a nih chuan kan hma lawk October thla New Delhi-a Shooting World Cup-ah hian a inlan dawn lo nia ngaihna a piang!
Kum 22-a upa Bhaker hian Paris-ah khan India tan Olympic history thar a ziak hlimhlawt a, karliamta khan Paris atanga a thlawhhaw hnuah Pathianni zan closing ceremony-a India flag keng turin France ramah a thlawkkir leh a, tunah chuan chawlh hmangin turin an veng lam a pan ta rih a ni.
Rana chuan amah pawhin Khuangchawi thla Shooting World Cup-a Manu inlan dawn leh dawn loh a la hriat bik loh thu sawi chungin thlathum a chawlhahdam rih phawt dawn tih a sawi a, a chawlh lak dan chu thil pangngai a nih thu leh hun rei tak training kalpui tawh a nih avangin a lo berah pawh three-month break tal chu a mamawh niin a sawi.
He shooting World Cup hi October ni 13-18 chhungin New Delhi-a nghah tur a ni a, tah hian a inlan lo a nih pawhin thla thum hnuah chuan 2026 Asian Games leh Commonwealth Games atan inbuatsaihna ngawrh takin an kalpui chhunzawm leh nghal dawn tih shooting coach hian a tarlang tel.