Mariah Carey ‘All I Want for Christmas Is You’ a Hot leh ta

Mariah Carey ‘All I Want for Christmas Is You’ a Hot leh ta
Krismas boruakah chuan Mariah Carey Krismas lengzem hla ‘All I Want for Christmas Is You’ hi a lar thar leh tlat thin, tunah pawh Billboard Hot 100 (singles) chart-ah a No.1 leh ta a, he chart-ah hian a zawn lovin kar 15 a No.1 tling a, tun kum ruk chhung chu December thlaah No.1 a la kai ta ziah a ni.
He hla hi November 1994 a tlangzarh ‘Merry Christmas’ album ami niin, hetih lai hian tun angin streaming te a la awm lo va, Hot 100 chart-ah pawh streaming lar hnu, December 2017-ah a vawi khat nan Hot 100 top 10-ah a lang chauh a, December 2018-ah a vawi khat nan top five a kai a, chumi hnuah kumtin December thlaah No.1 a kai ta ziah a ni. 2019 khan kar thum chhung a No.1 a, 2020-ah kar hnih, 2021-ah kar thum, 2022-ah kar li leh 2023-a kar hnih No.1 lehin, kuminah pawh a lo berah kar hnih chu a No.1 leh ngei dawnin a lang.
2021 khan Carey chuan he hla chungchang hi sawiin, “Ka phuah lai khan khawvel huapin heti khawpin a la lar ang tih ka ngaihtuah pha lo. Mi tam takin kumtin inawih tlei nan an lo hmang thin hi nuam ka ti takzet a ni,” a ti.
Carey hian Billboard Hot 100 chart-a No.1 kai thei hi hla 19 a nei tling tawh a, soloist zinga chuan he chart-a No.1 kai thei hla ngah ber niin, The Beatles chiah a pha lo a, anni hian No.1 kai thei hla 20 an nei. Carey hi 1990s, 2000s, 2010s leh 2020s ah te No.1 kai thei hla nei thei hmasa ber a ni bawk. ‘All I Want for Christmas Is You’ hi 2019, 2020, 2021, 2022, 2023 leh 2024-ah No.1 a kai thei a, kum ruk chhung a zawna kumtin chart No.1-a lang ziah thei hla awm chhun a la ni.
December thla han kai hi chuan Krismas rimnam hla hi a hralh a kal thar ve thin reng reng bawk a, tunkar Hot 100 chart top 10-ah pawh hla panga chu Krismas rimnam niin, top three pawh hetiang lam hla vek a ni a, Brenda Lee ‘Rockin’ Around the Christmas Tree’ chu No.15 atangin No.2-ah a invawrh a, he hla hi nikum khan kar thum a lo No.1 tawh a, an tlangzarh atanga kum 65-naah No.1 a kai thei chauh a, Wham! ‘Last Christmas’ chu No.18 atangin No.3-ah a invawrh a, he hla pawh hi 1984-a an tlangzarh kha niin, tun hi he chart-a a tawn sân ber a la ni.
Krismas rimnam hla dang pahnih pawh chart top 10-ah langin, Bobby Helms ‘Jingle Bell Rock’ chu No.19 atangin No.5 a kai a, Burl Ives ‘A Holly Jolly Christmas’ chu No.33 atangin No.10-ah a invawrh bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan ian all-genre US streaming (official audio leh official video), radio airplay leh sales data te chu tehna pawimawh a ni a, ‘All I Want for Christmas Is You’ hian stream maktaduai 38.2, radio airplay maktaduai 24.4 leh sales 3,000 kaiin, hei hi a vawi 15 nan a No.1 pui leh ta a ni.
Carey hi Hot 100 chart-a a No.1 hmasak ber chu August 1990 kha niin, ‘Vision of Love’ a No.1 pui a, tunah No.1 kai leh in, a No.1 hmasak ber leh a thar ber inkar rei zawng hi kum 34 leh thla li leh kar hnih a ni a, No.1 nih hmasak ber a thar ber inkar hlat ber dawttu a la ni a, he chart-a a hla No.1 kai tawh zawng zawng No.1 hun chhung belhkhawm pawh kar 94 tling tawhin, he chart-a No.1 ni rei ber record a siam a sawh nghet leh ta sauh a, a hnaih bertu Rihanna chukar 60 niin, kar 34-in an inthlau tawh a ni.
Kendrick Lamar ‘TV Off’ featuring Lefty Gunplay chu No.2 atangin No.4-ah a tawlh a, Lamar hla dang ‘Luther’ featuring SZA chu No.3 atangin No.6-ah a tawlh a, a hla dang ‘Squabble Up’ chu No.1 atangin No.7-ah a tawlh ta bawk.
Chart No.1 hlui Shaboozey ‘A Bar Song (Tipsy)’ chu No.6 atangin No.8-ah a tawlh a, Lady Gaga leh Bruno Mars ‘Die With a Smile’ chu No.7 atangin No.9-ah a tawlh ta bawk.