Mark Zuckerberg-a sana manto

Mark Zuckerberg-a sana manto
Meta CEO Mark Zuckerberg chuan medical research tihchak nan artificial intelligence (AI) hman a tum dan leh a ruahmanna te sawi zauna a neihnaah Rolex sana hlui, 1950s a an siam tawh, thla (moon) mechanical cycle zui thei tura an duan a bun chhuak a, he sana hi dollar maktaduai 2 chuang man a ni.
He tech billionaire hi filmed interview ‘No Priors’ podcast-ah a nupui Priscilla Chan nen inlanin, an nupa hian medical research lama hmalak an tumna, Biohub, chungchang an sawi dun a. Biohub hi Chan-Zuckerberg hmalakna niin, natna chi hrang hrang umbo a nih theih nana tunlai thiamna changkang ber berte hman an tumna a ni.
An nupa titi hian ngaihven a hlawh viau rualin, Zuckerberg-a ban veilama sana chuan mit a la ta riau a. Rolex 6062 “Stelline” an tih ang sana a ni a, hetiang sana hi hmuh tur pawh a awm tawh mang lo a, khawvel hmun hrang hranga sana collector ten neih tuma an zawn nasat pawl tak a ni a, Stelline sana te hi a la that dan a zirin dollar maktaduai chuang man a ni vek tawh a, a hmel hem lo te phei chu dollar maktaduai 2 chuang man te a ni.
Reference 6062 hian Rolex history-ah hmun a chang pawimawh khawp mai a, 1950 vela an siamchhuah kha niin, he Swiss sana siamtute hi an la lar tak tak hma a ni a. Reference 6062 hi an tichhuak rei lo a, Rolex model zinga automatic triple calendar an hmanna awm chhun pahnih zinga pakhat a ni. Hetiang an hmanna dang chu Reference 8171 a ni.
Reference 6062 hi ‘Stelline’ tiin an sawi bawk a, chu chu Italian niin, ‘arsi tê-te’ tihna a ni, eight star-shaped gold marker an hman vang a ni. He sana hi collector lamin an zawn nasat niin, 2023 khan Stelline sana la tha zet mai chu Christie’s-in an lilam a, dollar maktaduai 2.7-in an hralh thei tlat. A version vang lehzual black dial leh diamond hour marker nei phei chu nikum khan an lilama dollar maktaduai 6.2-in an hralh thei a, Rolex sana hralh to ber te zinga mi a ni nghe nghe.