Marquez chak zawn vawi rukna!

Marquez chak zawn vawi rukna!
Moto GP race-a vawi ruk ngawt mai han chak zawn theih chu a nep lo khawp ang a, world champion tum ruk ni tawh Marc Marquez hian kum 2019 hnu lama a hmasa ber ni turin MotoGP title lak a hnaih zel. Chuti ang dinhmuna ding tur chuan Pathianni khan Austrian Grand Prix-ah a chak leh.
Spaniard Marquez hi Inrinni aitechhinna sprint race-ah pawh pakhatna ni bawkin, sprint bika vawi hnih a chak zawnna a ni nghal a; Pathianni intlansiak tak taka hnehtu a nih leh tak hnu khan championship standing-a amah hnaihbertu leh a nau ni bawk Alex Marquez lakah point 142 zetin a fal tawh a ni.
Austrian Grand Prix-ah khan hun hmasa lamah hnehna a la sualchhuak ngai lo a, mahse, a kal tluan lai nen a innang a, kum 2014 hnu lama a tum khatna ni turin intlansiak vawi rukah a chak vek a, kumin May thla British Grand Prix hnu lamah khan pakhatna nih loh a la nei leh ta rih lo!
Kum 32 mi ni tawh chunga rider thaza zawkte la khin phak meuh loh Marquez chuan Austria leilunga a chak vawi khatna chu a ngaihlu ve hle tih sawiin, “He hmuna hnehna ka chang ve ta hian min tihlim ngawih ngawih a ni.
“Team kan inrem dan a fuh a, a bik takin tyre kan thlan dan a dik a; a tir lamah khan Marco (Bezzecchi) kha a khawng hle mai a, mahse, kan han nghak det a, a risky viau a, nghah phawt hnuah a tawp lama nawr kha kan titlu ta a ni,” tiin team ral rel dan a sawichhuak.
Pole position atanga tlan chhuak Aprilia Racing rider Bezzecchi khan hun tam zawk hma a hruai a, race tawp lamah Spaniard chuan a han um tak tak a, a tawp meuh chuan Italian rider Bezzecchi kha pathumna niin lawmman semna dawhsan hniam berah a ding pha ta chauh a, Gresini Ducati rider Fermin Aldeguer chu pahnihna niin, Spaniard tan tun kha a MotoGP result tha ber a ni nghal.
Race vawi kaw tlan tur la awmah Marquez chuan chungnung larhin driving seat a luah a, a chesual fe a nih loh chuan a career-a MotoGP lallukhum pasarihna tur hi a nghahchhuah ngei a rinawm chho zel a ni.