Martar 10-te vui dawn ta

CRPF te kah hlum, Manipur-a Zo hnahthlak mi 10-te ruang chu phum tum a ni ta a, December ni 5-ah anmahni thlahna hun hmangin vui liam tum an ni.
Mi 10-te hi November ni 11-a Jiribam district-ah CRPF te’n an kap hlum a, ni 16-ah Lamka thlenpui ni mah se mipuiin post mortem report hmuh phawt an phut avangin anmahni thlahna hun hmang lovin damdawi inah ruang hi dah a ni. Kar hmasa khan post mortem report hmuh a ni ta a, anmahni thlahna hun hman an tum ta a ni.
Manipur-a Zo hnahthlakte inzawmkhawmna pawl pakhat Indigenous Tribal Leaders’ Forum (ITLF)-in Inrinni khan thuchhuah an siam a, post mortem report hi forensic leh dan lam thiamte’n an en a, lungawithlak an tih thu, December ni 5-ah vui liam tum an nih thu an sawi.
November ni 7-a Meitei te tihhlum Zosangkim Hmar leh chumi hmaa boral mipa pakhat nen, an vaiin mi 12-te thlahna hun Peace Ground-ah hman a ni ang a, chumi hnuah Martar thlanmual-ah phum an ni ang.
Zosangkim hi Jiribam district-a Zairawn khaw mi, chhungkhat nu ber a ni a, Meitei-in rawng takin an tihlum a, he thil thleng vang hian tun hnaiah Manipur-a Zo hnahthlakte leh Meitei kar a lum leh. Chutiang boruakah chuan Zo hnahthlak lam volunteer-te chu Jiribam districrt-ah hian an kal a, chutianga kal zinga mi, mi 10-te chu an kir leh lam CRPF te’n lo lambun-in an tihlum a ni.
Mi 10-te ruang hi a tirah Silchar-ah lak a ni a, Silchar Medical College-ah harsatna leh boruak lum tak karah post mortem tih niin, ni 14-ah an zo thei chauh a, Mizoram kaltlanga Lamka-a lak tum a nih laiin Manipur sorkar duh danin helicopter hmangin Silchar atang hian Lamka-ah lak a ni ta a ni. Zo hnahthlakte’n post mortem report tihdanglam te a awm ang tih hlauvin, report an dawn hma chu vui lovin Lamka-a District Hospital-ah ruangte hi dah a ni a, chhun zan zawmin thalaiin an awm chilh bawk.
Ruangte hi zah taka vui liam an tum a, December ni 5-ah hian Lamka-ah dawr leh office-te khar tur an ti.