Martar lungphun kum 26-na hmang

CTI Sesawngah Congress Thalai huaihawtin Martarte Lungphun kum 26-na champha hman a ni a. Congress Thalai Hqrs. hruaitu hlui leh MLA ni mekten pangpar an dah.
Congress Thalai president hlui, Martar Lungphun dinnaa sulsutu John Rotluangliana chuan thu sawiin, remna leh muanna kan neih theih chhan chu Congress party vang leh a hunlaia chief minister Pu Lal Thanhawla’n chief minister nihna a ken vang a ni, tiin, “Chief minister thuthleng inken hi thil har tak a ni tih kan hre vek. Mizoram tan Zofate tana remna siamtu Pu Lal Thanhawla hi theihnghilh chi a ni tawh loa, sawi nep chi a ni lo,” a ti. Remna nena an lo haw hnuah pawh MNF party hruaituten martarte lung phun tumna an nei reng reng nia sawiin, “Kha kha ngaituahna tithui tak a ni,” a ti.
Congress Thalai president hlui, CLP leader Zodintluanga chuan Sesawng CTI hmuna Martar Lungphunah hian ram buai avanga nunna chan mi 1168 hming ziahlan a ni a, Congress sawrkar kha khatih lai khan lo piang lo phei se chuan tuna lungphuna hming an ziah let hi ziah an ngaih a ring hial tih a sawi. Congress Thalai president Laltawnliana chuan ram leh hnam tana nunna chan ta te chu thangtharte thinlungah an dai tawh ngai dawn loa, an hrereng tawh dawn tih a sawi a. Kum 1997-a an din Martarte Lungphunah hian politics a awm loa, politics khelhna atana martarte hman chin chu thil tha lo leh tih chi loh a ni tih a sawi. “He thlanlungah hian politics a tel miah loa, MNF-te ramhnuai atanga an rawn chhuah atanga kum 11 chhungin martarte hriatrengna lung a awm loa, ram tana maichama an thisen hlu tak dahkhamtute tan Congress Thalai chuan he lungphun hi a din ta mai a ni,” a ti.
CTI Sesawng Martar Lungphun hi 1997 June 27 khan MPCC president Lal Thanhawla’n a hawng a. Lungphun buaipuitute hi Congress Thalai niin, he lungphun hi kumtih tlawhin June 27 apiangin programme an hmang thin.
Martar Lungphunah hian rambuai laia hnam sipai leh civil mi nunna chante hming, vawiin thlengin mi 1168 ziahlan a ni tawh a. Kum 2014 khan martar, sergeant Lalhulha ruhro pawh phum a lo ni tawh a, report thar dawn a awm chuan hming hi ziah belh zel a ni tih Congress Thalai chuan an sawi.