Martar Ni-ah inhlan thar turin ngen

Martar Ni-ah inhlan thar turin ngen
Ex-Mizo National Army leh Peace Accord MNF Returnees Association (PAMRA) chuan Martar-te Ni ah martar-te hlutna hrereng a, anmahni chawimawi a, ram leh hnam tan inthlan thar turin mitin an ngen tih an sawi.
Mizo Hnam Sipai Coordination Committee on Ex-MNA leh PAMRA thuchhuak chuan, Pathian-in min siam chhan anga mahni kea kan din chhuah theihnan leh min awpbettu lak ata tal chhuak a, chhim leh hmar chhak leh thlang amite rorelna pakhat hnuaia kan len za theihnan, MNF chuan 1966 March 1 khan independence puangin zalenna a sual a, Zoram leh hnam chhanna atan mi tam takin an nunna an hlan a. Chu’ng martarte pual chuan kumtin September 20-ah ‘Martar Ni’ hman thin a ni tih a sawi.
MNF khan zalenna sual lo ta se, thenawm state Tripura, Cachari leh Khasi ang maiin mahni ramah a neitu awmin kan awm ngam a rinawm tawh loh, tiin, martar-te kha tu emaw pawl bik leh party bik tana nun hlan an ni loa, Mizo hnahthlak zawng zawng tan an nun an hlan a. Mizo tawh phawt chuan hnam martar-te chawimawi chu kan bat a ni tih a sawi a ni.
‘Kumin Martar Ni a lo thlen hian martar-te zahna chibai kan buk a, chawimawina kan hlan bawk. An thisen far tawp thlenga rinawm taka Zoram chhanna atana an tawrhna avangin, Zofate chimrala awm mai tur chhan chhuaha kan awm hi a ropui hle,’ an thuchhuak chuan a ti.
Kumin Martar Ni September 20 chu Pathianni a nih avangin, vawiin – September 21 hian hman a ni dawn tih a sawi bawk.