Match 3 hrem tur Bellingham
Osasuna nen 1-1 a an inhnehtawk tuma hnawhchhuah Jude Bellingham chu match hnih khel thei lo turin hrem zui a ni dawn. Real Madrid chuan an midfielder Bellingham hremna hi khin nawn leh an tum thu an sawi.
Champion lai Real Madrid leh Osasuna te hi inrinni zan khan El Sadar mualah an inkhel a, 1-1 in an inhnehtawk. He inkhelah hian Real Madrid midfielder Jude Bellingham chu referee Jose Luis Munuera Montero lakah tawngkam mawi lo a hman vangin minute 39-naah hnawhchhuah a ni. Hnawhchhuah a ni a, hremna a tawrh zui tur hi Real Madrid chuan an khing let. Spanish Football Federation (RFEF) te chuan nilaini khan Bellingham hi khelh hnih inlan thei lo tura hrem a nih tur thu thuchhuah an siam. Khelh hnih chhung a inlan theih dawn loh vangin La Liga-h Girona leh Real Betis a hmachhawn ve thei dawn lo. Copa del Rey first leg-a Real Sociedad an hmachhawn hunah Bellingham hi an inlan thei tawh dawn thung.
England midfielder Bellingham chuan tum reng vang leh referee zah loh reng vanga tawngkam mawi lo hman lui a nih loh thu a sawi. England ramah chuan Bellingham tawngkam hman ang hi football player ten an hman fo thin a ni a. Referee te pawhin player hnawhchhuah phah nan an hmang ngai lem lo. Spain ramah erawh chuan tawngkam mawi lo hman hi an ngai thutak viau thung a, Bellingham pawh an hnawtchhuak hmak mai reng a ni. RFEF te chuan Bellingham hi nungchang mawi lo, referee te zah loh leh tawngkam thlahdah tak a nih vangin hrem phu reng a nih thu an sawi ve thung.
Jude Bellingham hian Real Madrid tan season kal meka inelna hrang hrangah vawi 33 lai a inlan tawh a, goal 11 a thun tawh bakah assist vawi 10 zet a nei tling tawh bawk. Champion lai Real Madrid hi La Liga game hnuhnung pathumah an chak zo lo vek a. An khelh that loh laia an player pawimawh Bellingham an chhawr thei lo tur hi channa nasa tak a tling ngeiin a rinawm.
Bellingham hremna chungchang hi Real Madrid chuan khin nawn leh an tum naa hlawhtlin a har tawh deuh mai thei thung. Referee leh La Liga thuneitute lakah an lungawi lohna hrang hrang vangin Real hian La Liga chhuahsan in ram dang league zawm tumna an nei hial a ni.