MATRIC EXAM ZAWHNA AVANGIN MINISTER HOIN THUKHAWM DAWN “Zirlaite tana tha ber tura hma lak a ni ang” – MBSE chairman

High School Leaving Certificate exam neih mekah Social Science leh subject danga zawhnaa thil felhlel awm nia ngaih theiha awm chu sawrkarin a enfiah dawn a, vawiin – March 11 hian School Education minister hoin a kaihhnawih an thukhawm dawn.Mizo Zirlai Pawl chuan HSLC exam-a SS leh subject danga question pattern felhlel awm leh question hre lawk awm anga sawi tur awm chu tha lo a tih thu a sawi a. Zirlai rilru thianghlimten zirna kawnga inelna thianghlim an neih mek lai a, an rilru tihnual thei thil thleng chu chhui a, hma la turin MBSE hotute a ngen tih a sawi a ni.
MZP Gen. Hqrs. hruaitute chuan Mizoram Board of School Education chairman JH Zoremthanga hmu in, he thil hi rang taka chhui a, mawhphurtu an awm a nih chuan a thlen nawn tawh loh nan hma la turin MBSE bakah Education minister an ngen tih an sawi
MBSE chairman chuan thui tak hma an lak nghal thu sawiin, minister hoa sawiho an tum thu a sawi. Chairman chuan hetiang thil a thleng hi pawi a tih thu sawiin, zirlaite tana tha ber tura hma an lak dawn avangin, zirlaite thlamuang taka lo awm turin a duh tih a sawi a ni.
MZP chuan HSLC exam mek zirlai tam zawkte rilru hnualna chu a rang thei ang bera chingfel a, a tul anga hma la tur leh MBSE zahawmna humhim zel turin thuneitute a ngen tih a sawi.
Mizo Students’ Union hruaitute pawhin MBSE chairman JH Zoremthanga hi hmu in, exam question set pattern leh school thenkhata syllabus an inpek Board question nena inang diak diak awmte chu zirlaite leh school zirtirtu atangin MBSE rinlohna thlen thei a ni tih an thlen.
Hetiang thil hi tunhma pawhin ngaihbel theih tura school thenkhat atanga syllabus inpek fuh bik riau a thlen thin tawh thu leh hetiang thil avanga admission thlenga nghawng thei thin a nih thu an hrilh bawk. Mizoram zirna quality leh zirlaite moral tichhe thei a nih avangin uluk taka chhuichiang tur leh inquiry la a, hrem ngai an awm a nih pawhin dan anga hrem ngei an phut tih an hrilh a ni.
MBSE chairman chuan Board mawhphurhna a nih angin hma lak ngei tum a nih thu a lo hrilh a. Thuneitu sang zawkte nen inrawnkhawm an tum thu hrilhin, he thil thleng hi an ngaih serious thu leh action lak ngei a nih tur thu a lo sawi a ni.