Matthew Perry a thi

Friends star Matthew Perry, kum 54, chu Los Angeles-a a chenna inah thi a hmuh a ni a, tuia tla hlum anga ngaih a ni a, police te chuan midang kut tuar a nih theihna awm rinhlelh tur an hmu lo niin an sawi.
Matthew Perry hi a Los Angeles-a a chenna ina tuilum bualthleng (hot tub)-ah an rama October ni 28 (kein tan 29 a ni hman tawh) khan nikhawhrelova hmuh a ni. Perry hian a thih hma ni ruk kalta khan Instagram-ah hot tub-a a thu lai thlalak a post a, chu chu Instagram-a a thil post hnuhnung ber a ni zui ta bawk a ni.
Matthew Perry hi 1969 khan Massachusetts-ah piangin, Canada-ah a seilian a, kum 15 a tlinin Ottawa atangin Los Angeles-ah pemin, high school a zawh hnuah lemchan lamah a lut ta a ni.
Kum eng emaw ti chhung chu TV lama part lian vak lo changin a tikual ve zak zak a, sitcom Boys Will Be Boys leh Growing Pains-ah te mi hriat a hlawh ve tan a, a lar chhuahna chu 1994-a ‘Friends’ a Chandler Bing lema a chan kha a ni ta a ni. Friends hi a hunlaia TV show hit ber pawl a ni a, Jennifer Aniston, Courteney Cox, Matt LeBlanc, Lisa Kudrow leh David Schwimmer te nen an chang ho a, season 10 chhung zet Friends hi an kalpui nghe nghe a ni, Perry hian 2002 khan Emmy nomination a neih phah a, a hnuah The West Wing leh TNT movie The Ron Clark Story avangin Emmy nomination a nei leh bawk a ni.
Friends tawp hnuah Perry hi TV comedy Studio 60 on the Sunser Strip, Go On leh The Odd Couple-ah te chang lehin, movies-ah pawh The Whole Nine Yards leh a chhunzawmna The Whole Ten Yards-ah te a chang bawk.
Matthew Perry hi zu leh ruihhlo avangin a buai ve thin hle a, 2018 khan ruihhlo laka a fihlim lai ni mah se rei tak ruihhlo a lo khawih tawhna avangin a ril a pawp a, kar hnih lai nikhawhrelovin a awm a, thla nga chhung damdawi inah awmin, vawi tam an zai nawn a, a rawn tha chhuak leh hram a, tunah erawh ama inah ngei, a hot tub a tuiah a tla hlum ta a ni.