Mau lamah kan tluang lo?

Tunhnai khan MPCC hruaitu pakhatin State Bamboo Mission hnuaia mau atanga meihawl siamna tur project cheng nuai 252.8 senga din Sairanga ami a tlawh a, he plant hi hawn a nih rualin an kalpui zui thei lo nghal niin a sawi a. Hei hi sawrkar lam hian engtin nge an rawn sawifiah dawn ni?
Tunhma atang tawhin Mizoram Mau hi election campaign auhla pakhata neih thin a ni a. Mizoramin a tualto Mau kan ngah a, state economy chawikang dawrh theitu tur a nih thute pawh mipui bengah chuan a ri zing malh malh thin hle. Sawrkar apiangin mau hi engtin emaw tak an han buaipui ve hluai thin a, mahse economy chawikang dawrh thei khawpa Mau chhawr tangkai thiam leh chhawr tangkai thei sawrkar hi an la awm lo niin a lang. 
Kum sawmhnih chuang kalta 2002-ah khan Industries department hnuaiah Mau hmanga hmasawnna sual chhuaktu tur society pakhat Bamboo Development Agency (BDA) din a ni a. BDA hnathawh tur (Objectives)  lian zualte chu, ‘... to develop and regulate resources, plantation, utilization, research and development of bamboo...’ tih a ni a. Hetiang a nih chuan, khawi kipah, hawina lam apiangah BDA hming hi hmuh tur awm awm tak a ni a, mahse BDA hming hi a vang pharh mai niin a lang.
Mahni ram tualto Mau chhawr tangkaina tur ngaihtuah em em si lovin, mi rama to Mau chawkluh kan tum thul, kan enchhin thul, a enga mah chu kan hlawhtlinpui chuang hlei lo a. Chutih laiin, kan thenawm state miten, kan lui tui tha chakna ringin an ramah kan Mau an tawlh lut dul dul a, ‘khu pawh, khu pawh’ tiin tlang chhip atangin state danga tawlh lut tur Lui dung dap khat vek khawpa tam Mau tawlh dul dul kan thlir liam zut zut reng mai a ni a. 
Tuna India sawrkarin Biofuels lama hmalakna lian tak a kalpui mek ‘Ethanol Blended Petrol (EBP) Program’ te hi, he Biofuels siamchhuah theihna hmanrua (bamboo etc) ngah em em Mizoram hi chuan bawhzui ve ruak ruak awm tak kan nih laiin, thawm kan chhuah lo hle a. Tuna EBP Program-in a tum chu, kum 2030-ah chuan petrol-a biofuels pawlh zat hi 20% a tling tawh tur a ni’ tih a ni a. Mau atanga Ethanol sawr chhuahna tur project hi Mizoram hian beihpui thlaknan kan hman phawt chuan, kan thatpui theih tur chi niin a lang.