India hockey defender Nilam Sanjeep Xess-a chu Men’s Hockey World Cup 2023 khelh mekna Odisha state-a Sundargarh district Kadobahal thingtlang khuaa chirh zutmam in (kutcha/mud) atanga zi-chhuak niin, India opening match-a Spain an hneh tum khan Rourkela khuaah a World Cup debut a nghakchhuak a, retheihna thuk ber atangin rising star a rawn nih chhoh dan hian India media-te ngaihven a hlawh a, keini lam pawhin kan han chhui ve hlek dawn a ni.
Nilam-te chhungkaw chen-na in te takteah hian gas leh tui connection an nei lo a, an fapa tan hockey practice ringawt pawh hi chona lian a ni a; kum 40 leh a hmalam liamtaa Mizo naupangte ang bawkin mangai tiangkawm a nei zo lo a, mau tiangkawm nen bul a tan.
-- Advertisement --
Nilam-a pa Bipin Xess chuan reitheihnain a danbeh zawh loh a fapa hmasawnna a thlir a, hockey level sang bera a rila rah a inlan ve thei ta mai ropui a tih thu amah kawmtu ANI hnenah hahipin a sawi.
Bipin-a chuan, “Kan fapain World Cup-a ram ai a awh ve tur thu kan hriatin kan chhuang takzet a; a naupan lai khan Nilam hi a u mipa leh a thiante nen mau tiangkawm hmangin hockey an khel thin a, ball atan pawh puan tel ruh an hmang mai thin,” a ti.
Electric eng pawh vana rah ang a nihna thingtlang khuaah hian lo neih hmangin Bipin Xess hian a fate a enkawl seilian a; chutiang chhungkaw tan chuan an fapa tan hockey zirna hmanraw tha chhawpsak a harsa a, mahse, retheihnain a hneh loh Nilam chuan World Cup a khel mek si.
Bipin Xess chuan sawi-belhin, “Sawrkar atangin eng tanpuina mah kan dawng lo a, chirh hmanga zutmam in bak chenna atan duhthlan tur dang kan nei lo.
“Chawlh hmanga kan fapa a lo haw chang pawhin kan chenna inah chuan a khawsa ve mai a, eng scheme emaw ber hnuaiah sawrkar hian in pangngai (pucca house) din turin min han pui ve se chuan kan lawm ngawt ang,” a ti.
An fapa chuan kum 2015 leh 2016 khan an chenna state Odisha chu Junior National title lakpuiin, a hnuah Odisha senior team tana khel turin sengluh a ni a; nikum khan an state chu Senior National-ah pathumna nihpuiin, kumin hian World Cup hial a khel ve ta a, mahse, tun thleng hian kutcha house-ah a la cheng!
International kawtkaiah pawh a invawrhchhuak zui ta nge nge a; 2016 South Asian Games-a silver medal latu Indian team-ah khan rawlthar kum 17 mi lek ni chungin a tel a; Bangladesh-ah Asia Cup Under-18 title a lakpui tawh bawk.