Maxi cab-a thil thawn/ phurhah fimkhur dawn

Khawzawla maxi cab counter atangin ruihhlo inthawn tumna a awm lohna turin ruahmanna siam a ni dawn.
Police Hqrs. lam atanga ziaka thurawn hmuh, Mizoram Maxi Cab Service leh counter atanga bungraw thawn leh phurh zingah dan phal loh ruihhlo tawlhruk a awm fo thin tia sawi chu, tireh tura ruahmanna siamin Khawzawl district bawrhsap K Lalrohlua kaihhruaiin thutkhawm a ni a. Khawzawl SP Lalchhuanthanga bakah Khawzawl Maxi Cab Owners Association leh maxi cab counter neitute aiawh an tel.
Dan phal loha ruihhlo leh thildang tawlh tihtawp a nih theih nan maxi cab counter-a CCTV vuah leh thil thawn dan rel a ni a. Counter-te chu November 27 (Thawhtanni) atangin thil thawntu leh dawngtu turte nihna bakah thawnna lirthei neitu leh khalhtute nihna kimchang chu, a format duansa hmanga chhinchhiah turin tih an ni. Maxi cab-a thil thawn tur reng rengin counter kaltlangin thawn vek tawh tur a ni a, Khawzawl Tuisenphaiah thil thawn hi a khat tawkin police-ten counter-te chhinchhiah nen a inmil em tih cross-checking an nei thin ang.
Counter-a CCTV vuah chungchang chu SP Office Khawzawl, Khawzawl Maxi Cab Owners Association leh counter neituten November thla chhung hian dan awmsa leh counter hmunhma lo zirchiang se, tia rel a ni.
Khawzawl maxi cab service dan pawh sawiho a ni a. Khawzawl Maxi Cab Owners Association leh counter neituten ruahmanna an siam hi mipui tan pawha tha ber rih nia hriat a ni a, kalpui zel nise tih a ni.