Mbappe an nghakchhuak ta

Pathianni zan khan Spanish La Liga 2024-25 khelh chhunzawm a ni a, season thara bul tan tha lo Real Madrid chuan hnehna an nghakchhuak a. An forward thar Kylian Mbappe goal thun hmuh an nghahhleh em em pawh an nghakchhuak ta bawk.
Champion lai Real Madrid hian Pathianni zan khan Santiago Bernabeu-ah Real Betis an mikhual. Los Blancos hian an mualah khel tha viau mah se goal erawh an thun mai thei lo thung. Darkar khat chuang zet goal a luh theih loh hnuin mualneitu Real Madrid in goal an thun ta nge nge. Minute 67-naah Kylian Mbappe chuan Federico Valverde siam sak atangin hmahruaina goal a thun.
Hmahruaina goal an thun vangin Real Madrid hi phur leh zual zawkin an inlan a, goal pawh an thun belh leh thuai. Brazil forward Vinicius Junior chuan penalty a hlawhchhuak. He penalty hi Kylian Mbappe chuan si nghak Silva bawh loh lamah a pet goal a, minute 76-naah an goal hnihna a thun. Mbappe goal hnih thun hmangin Real Madrid hian hnehna pawimawh tak an chang a, point thum an hmu ve leh ta nge nge.
Forward tha ber pawla ngaih a, World Cup 2022 a top-scorer leh PSG tan goal 256 zet thuna PSG tana goal thun hnem ber ni bawk Kylian Mbappe hian nipui bazar lai khan Real Madrid a zawm. A club thar tan a inlan hmasak ber UEFA Super Cup-ah Atalanta an hmachhawn tumin Mbappe hian goal a thun nghal a, che bon zui viau tura ngaih a ni. La Liga season thar an tan a, Mbappe lakah beiseina sang tak nghat bawk mah se an nghah an nghakchhuak mai lo. Mbappe hian La Liga match hmasa pathumah goal a thun lova, assist a nei miah lo bawk. Ring ang hehuin a che bon thei dawn lo nia ngaihna a awm laiin Real Betis lakah a zia tak tak a chhuah a, goal hnih a rawn thun ta a ni.
Champion lai Real Madrid hian season tharah vawi li an khel tawh a, vawi hnih chak tawhin draw vawi hnih an nei a, point 8 hmuin pahnihnaah an awm mek. Real Madrid chungah hian vawi li chak zawn tawh FC Barcelona an awm a, an inkarah point li a tlazep mek.