Quarter-final ah Dimitrov vs Tiafoe

US Open 2024 khelh chhunzawm zel a ni a, mipa lamah Grigor Dimitrov leh Frances Tiafoe ten last 16-ah hnehna changin quarter-final an lut. Inkhel dangah Alexander Zverev pawhin hnehna a chang a, a vawi khat nan Grand Slam-ah champion thei turin hma lam a pan zel.
Bulgarian Grigor Dimitrov hian last 16-ah Russian player langsar Andrey Rublev a hmachhawn a, a khingpui lakah bul a tan tha hle. Set khatnaah break pawimawh tak neiin Dimitrov hian game thum hloh chungin set a la. |ha takin bul tan mah se set hnihna atangin fiahna hautak zawk a hmachhawn a, set lak a awlai ta lo hle. Set hnihnaah Rublev nen hian an inhnehtawk viau a, tie-break khelh a ngai. Tie-break ah tawnhriat ngah Dimitrov a chungnung a, set a la nawn leh.
Set hnih a hloh zawn hnuin Andreu Rublev a insiamtha a, awlsam taka set hnih la zawnin chak et beiseina sang tak a nei hman. Rublev hian set thumnaah game khat chauh hloh chungin set a la. Set khat a lak hnuin Rublev hi inrintawkna sang zawk nen an inlan a, set linaah break pawimawh tak a nei zui a, game thum hloh chungin set a la nawn leh. Set hnih ve ve an lak hnuin deciding set khelh chhunzawm a ni a, set pawimawh takah Mimitrov a che fuh nawn leh a, break pawimawh tak a nei. Break a neih vangin set a la zui leh a, 6-3 7-6 (7-3) 1-6 3-6 6-3 a hnehna changin quarter-final a lut. Dimitrov hian kum 2019 hnu lamah US Open quarter-final a luh lehna hmasa ber a ni. Quarter-final-ah fiahna hautak a hmachhawn zui leh dawn a, a thlengtu branch aiawha inlan Frances Tiafoe a hmachhawn zui leh dawn.
Dimitrov hmachhawn tur Tiafoe hian third round-ah inlehthalna lian thlentir a, Novak Djokovic vaw tlatu Alexei Popyrin a hmachhawn a, set khat hloh chungin hnehna a chang a, quarter-final a lut.
Djokovic lakah tha chungchuang taka inlan Popyrin hian Tiafoe lakah a khel tha lo a, hnehna chan phuin a inlan thei lo. Tiafoe hian set khatnaah break a neih a chhawr tangkai a, game li hloh chungin set a la phawt. Set hnihnaah an inhnehtawk zui viau a, tie-break khelh a ngai. Tie-break-ah Tiafoe a chungnung zui leh a, set hnih a la zawn. Set hnih a hloh zawn hnuin Popyrin a insiamtha a, set thumnaah tha taka inlanin awlsawm takin set a la. Set a lak vangin beiseina thar nei bawk mah se set linaah Tiafoe a chungnung zui leh a, Popyrin lakah hian 6-3 7-6 (7-3) 1-6 3-6 6-3 a hnehna changin quarter-final a lut ta a ni.
Inkhel dangah American Taylor Fritz chuan set a hloh hmask hnuin a khinpui Casper Ruud a hneh let a, Alexander Zverev hmachhawn turin quarter-final a lut.
Olympic a champion tawh, Grand Slam final vawi hnih khel tawha la champion lo Alexander Zverev hian last 16-a a khingpui American Brandon Nakashima chu 3-6 6-1 6-2 6-2 in a hneh.