Mbappe hralh tumin PSG insingsa \an!

Mbappe hralh tumin PSG insingsa tan!
Paris St-Germain chu tunlai hian an France forward Kylian Mbappe hralh turin an inbuatsaih tlat mai le!
Mbappe hian Uefa Champions League title a lakpui theih loh French club hi contract thar ziahpui a tum loh thu a hrilh chiang tawh a, chuti a nih chuan kum khat chhungin free agent-a an chhuahtir mai mai a ngai dawn a, chu ai chuan sumtuakna atana kumin nipui thawt lai ngeia hralhsuma hman hi an tum ta ni berin a lang a, chu chu an tan pawh tih awm tak ni rengin a lang.
Season thar tawp rualin France forward contract neih lai hi a zo ve tawh dawn a, an inrem-naah pawl pahnihin an remtih dun chuan kum khat dang contract pawhsei leh theih tih bilh tel bawk mah se player berin inremna thar ziah a tum tawh loh thu a sawi miau si a, French champion tan duhthlan tur dang a awm lo.
Mbappe hian kum 2025 thleng contract pawtsei turin thla thar July ni 31 thleng hi hun a nei a, a thla tel an inbiak hnuah player hian club hnenah lehkha thawnin, contract pawhsei a tum loh thu a hrilh chiang tawh a ni.
Season thar tawp thlenga thumum an neih loh chuan PSG record goalscorer hian a free-in Parc des Princes club a chhuahsan mawl ringawt thei dawn a, chu chu PSG tan duh chi a ni dawn hauh lo a, man man taka hralhchhuah dan kawng dap mai chu an duhthlan tur neih chhun niin a lang.
French champion hian kum engngemawti chhung chu team thuamchak policy an kalpui a, Arab hausakna ringin star player pawh an lei mawlh mawlh a, mahse, an awh ber Europe club trophy lian ber an hawn thei lo a; tun dinhmunah team thar dinchhuak leh tura an naupang lam ei tling tura chherpuitlin lam an hawi ta zawk niin a hriat a, chu chu Messi chhuah chhan pakhat pawh kha nia sawi a awm a, Mbappe pawh hian footballer-te awh lian berte zinga mi Europe khawmualpui trophy lian lak theihna ngei tur club zawm hi a duh ve ta niin a ngaih theih ang.
2018 World Cup winner-in chhuah lam a awn tih hriat a nih rual hian Europe club lianho chu an awm mai mai thei dawn lo tih a chiang a; star player han tih tur kawl mang tawh lo Real Madrid hi hun rei tak atanga he Frenchman lo ngaisang tawhtu niin, nikum mai pawh khan lei tumin an lo dawr tawh a, khatih lai khan PSG-a cham rih thlangin Bernabeu sawmna a lo hnar tawh a ni.
Tunhnai maiah Cristiano Ronaldo awm loh hnua an hmatawng pawimawh Karim Benzema chuan Saudi Arabia panin a chhuahsan a, Tottenham milian Harry Kane beisei tho mah se Real hian striker rintlak an mamawh hle a, Mbappe hi thapui thawha an dawr leh ngei rin a ni.
Spanish giants bakah hian English club hraw pathum – Manchester United, Chelsea leh Liverpool bakah Bundesliga giants Bay-ern Munich nen pawh tinzawn leh sawizawm nghal a ni.
Euro maktaduai 180-a an lei ngheh hmaa Monaco atanga loan-a kum 2017-a an lo chhawr tawh Mbappe hian PSG tan match 260 khelin goal 212 a thunsak tling tawh.
France tan pawh game 68 atangin goal 38 a tilut tling tawh a, chu’ng zingah chuan nikum Qatar ram world cup final penalty peta Ar-gentina an hneh loh tuma a ‘hat-trick’ siam kha a tel nghe nghe.
Tunhnai season liamta panga chhung tehreng khan Mbappe hian Ligue 1 top scorer ni zat zat chungin season a hmangliam a; Paris club-a season ruk a khawsak tawh chhung hian league title vawinga a lakpui tling tawh!
PSG hian Ligue 1 title nen 2022-23 season an hmangliam leh a, an it ber Champions League lamah erawh Bayern Munich-in last-16 lamah an pet thla thung.
Major League Soccer club Inter Miami tana season hnih khel tura Argentina forward Lionel Messi an thlahliam hnuah Mbappe hi kumin nipui thawt laia Parc des Princes chhuahsan tur player hraw pahnihna a nih ngei hmel ta.
Season liamtaa PSG superstar frontline member pathum zinga pakhat Neymar pawh tunlai hian Messi kalna Saudi Arabia nen sum tam tham tak hlawh tura sawizawm a ni ve leh mek!