MBBA Favang Tournament – Finals The People’s Champion Zemabawk BC versus The King Zarkawt BCA
MBBA Favang Tournament – Finals
The People’s Champion Zemabawk BC
versus The King Zarkawt BCA
Club lian leh hlun insawhnghet tawh Zarkawt BCA leh Khatla TBL ten inelna hmawrbawk (Finals) an khelh thinna tualah ngei mai, mipuite thlawp rawn leh tan rawn Zemabawk BC chuan thawnthu ngai tum tam tak lo inherchhuak thin chu an rawn thai dang ta a, a zawnin MSL 11 finals leh MBBA favang tournament-ah finals an lut ta – Aizawl hmar lam thli a na ngei mai!
Mizoram basketball history thlirin, player naran tan pawh Zarkawt BCA jersey ha phak nih hi thil hlu a ni a; tualchhung player mai bakah hnam dangin champion nomawi chawi tur chuan Zarkawt BCA aia club thlanawm a awm chuan bik loh avangin player tha rual Zarkawt BCA ah an lut khawm thin – Mizorama club record nei tha ber an ni zui.
Zarkawt BCA leh Khatla TBL ten an awp beh hneh em em thiat turin club tam tak an lo piang tawh thin a, an ralin an zuih leh mai thin. He club pahnih insawhnghet lutuk ning thawm hi a ri a ring tial tial a, anni tum tawk deuh hlek apiang hi chu tan an hlawh – finals khelh a nih meuh chuan club lian pahnih bawk hi an intum leh nge nge a, chanchinthar (news) pawh a tling zo tawh lo hial! Tournament tan a nih rualin finals hmachhawn tur club pahnihte hi rinna lama pachhe deuh tan pawh lo sawi lawk ngam a ni.
Ngai teh, Mizoram top club pahnih hneh tur hi chuan chhungkaw lian leh intelkhawm tha tak a ngai tih Zemabawk BC puipa lam hian an hre thuai a – club satliah aiin thumal zahawm tak chhungkua leh ZBBC chu suihzawmin a awm zui a, news a rawn piang zui ta mawlh mawlh mai a ni!
Club dangin supporter leh fans an nei a, ZBBC erawhin family an nei a, hei an pung tial tial. An family pawn lama mipuiten an thlawp zui em em cheu hi he club hian a theihnghilh ni chu tlakchhiat in tanna kawngkapui an hawn ni tihna a ni mai.
Khawvela chhungkaw lian ber Baktawng pa Zion-a te hawi loh dan zawngin ZBBC hian chhungkua a din thung tihna a nih ber chu!
The Undefeated
Tun tournament-ah hian Zarkawt BCA leh Zemabawk BC hian hneh loh an la nei lo va, zanin hian hneh lo nei zawk an awm tawh dawn thung! An team paltlang leh pal darh tak te thlir hian ‘Dream Finals’ tih koh loh theih a ni lo.
Zanin hian The Twin Tower Matthew Sailo leh Big Mike te hian thahrui ngah Thianga leh Rinzuala (Ani hi a inlan ang em?) hma ah an sanna in awlsamna a siam ang em?
ZBBC lam double R – Ropuia leh Ruatkima dala dang tur hian an tiatpui Lalrina Renthlei kiangah Hmachhuana, Sangsanga leh Chhuanawma te an coach Ahruaian tlar chhuah tur a nei a; mahse, ZBBC lam hian rookie rawlthar Rinchhana, Hnehpuia leh Michael-a an nei lo bik em ni?
Hello, coach
Squad an nei chhah tha dun a, coach pahnih thluak inbeihna ah hian ZBBC head coach C. Vanengmawia nge Zarkawt BCA coach Lalhruaitluanga hi fimin fing zawk ang tih hi mi nawlpui aia tualchhung basketball inher vel hre thuk zawk te hmuh chak a ni.
Zarkawt BCA head coach nih hi hlu teh mah se, coaching staff an siksawi dan thin atangin pressure a sang – chung hun atana chuan Ahruaia hruaina hi a rintlak ang em?
ZBBC lam pawh hian MSL 11 finals hruai thlengtu an head coach thlak ngam khawpin champion nomawi chawi chaka an zin kawngah hian an thikthu a chhe ve hle tho!
Hawla Indoor Stadium,
zan dar 7
Mizoram Super League (MSL) tih lohah chuan MBBA buatsaih thin tournament-ah te hian a hmuna inkhel entu an thahnemngai vak lo – hei hi thu dik lem sak talh a ni.
ZBBC erawhin Tuikual South vanglai ang mai khan thlawptu an neih that, an family member-ten an team a hmun ngeia tawiawm nachang hria an pung a, tualchhung basketball hmelhmang an rawn thlak chho – zanin hian ZBBC family an tam dawn tih hi sawi lawk ngam, a ni.
Heng karah hian Zarkawt BCA lam hian club insawhnghet an nih ang bawkin, fans an neih te an nghet hle a, an rawn thawhchhuah that hun a inherchhuak e.