MBBS zirchhuakten ZMC-ah internship ti tan dawn

MBBS zirchhuakten ZMC-ah
internship ti tan dawn
Zoram Medical College atanga MBBS zirchhuak zirlai 68 bakah foreign atanga zirchhuak zirlai 6 chuan ZMC-ah internship an tan dawn a. Hemi puala Thawhtannia orientation programme neih chu Health minister Dr R Lalthangliana’n a hmanpui.
Health minister chuan ZMC zirlaiten internship an tan thei tur chu Mizoramin mellung a phun thar pawimawh tak a ni, tiin, Covid hrilen nasat laia Dedicated Covid Hospital-a ZMC puan a nih avanga zirlaite harsatna tawhin kian lam a pan mek chu lawmawm a tih thu a sawi. ZMC-a post graduate course hawn a nih theihna’n leh India rama medical college tha ber pawl a nih theihna’n tan lakpuiah a sawm.
Zirlaite chu an thlen chinah duhtawk mai loa kal zel turin a fuih a. Mizoramin medical doctor tam tak a mamawh tih sawiin, post graduate mai ni lo, super speciality thlenga zir tum turin a chah.
ZMC-a khum (general bed) 145 vel awm thin chu khum 432 a awm tawh thu leh, khum 500-a hlankai thuai a beiseiawm thu Dr R Lalthangliana hian a sawi a. ICU khum 13 awmna chu khum 50 chuang awmnaa hlankai a nih tak thu te, mi 60 awm theihna tur Intern Hostel chu peihfel thuai a nih tur thu te, cheng vaibelchhe 10 ve ve senna turin ZMC Boys & Girls Hostel sak mek a nih thu te, cabin 52 hawn mai theih a nih tawh thu te, Cardiology Department tihchangtlun nan Indian Council of Medical Research-in cheng vaibelchhe 1.02 an rawn pek thu te, LV Prasad Eye Care Institute bakah National Institute for Locomotor Disabilites nen thawhduna tha zawk neih tum a nih thu te a sawi bawk.
ZMC-a internship nei turte hian naktuk, May 3 thleng orientation programme hi an nei anga, internship hi kum khat chhung neih tur niin, 2024 April 30-ah an zo ang.