MBS pisa kai tur dang Chaw ngheiin nawr zui

Zirlaite hnena scholarship la pek loh pechhuak tura Mizo Zirlai Pawl-in a nawr mekna a hlawhtlin theih loh avangin November 16 zan atang khan MZP pisa puiah chaw ngheiin zirlaiten an nawr zui.
MZP Gen. Hqrs. huaihawta scholarship pek chhuah thuai phuta Mizoram Scholarship Board kawta ni hnih an punkhawm chuan awmzia a neih loh avangin Ningani khan MSB thawktute pisa kai tur dan tumin zirlai pawlte an pungkhawm leh a, pisa kai tum dan ngai an awm lo nia thu dawn a ni. Boruak duhawm lo thleng palh theiah dan leh thupek kengkawh turin magistrate kaihhruaiin police an duty a ni.
Scholarship pek chhuah thuai a nih theih nan MZP hruaitute hian an adviser thenkhat te nen Ningani khan chief minister Zoramthanga an hmu a, zirlaite scholarship 2nd installment hi sawrkarin Mizoram Scholarship Board account-ah a thunfel tawh a. Inthlan neih zawh tawh a nih avangin party advantage awm thei thil a ni tawh loa, sem thuai nise a duh tih chief minister hian a sawi a. Zirlaite scholarship pe thuai turin Higher & Technical Education department hotute leh MSB hotute a hrilh.
MZP hruaitute hian Higher & Technical Education principal secretary Esther Lalruatkimi pawh a office-ah an hmu nghal a. Election Commission phalna tel lo chuan a sem ngam loh tih a lo hrilh tih an sawi. Zirlaite mamawhna hria a sem mai tur leh, Election Commission pawh na taka nawr turin MZP hian an ngen a ni.
‘Higher & Technical Education secretary hi zirlaite tana ding ngam tawk loah kan ngai a. Kan dem takzet a ni,’ an ti.
An hmalakna in awmzia a neih loh avangin zirlaiten scholarship an hmuh hma chuan MZP Pisapuiah tiamchin awm loin November 16 zan atang khan chaw ngheia lungawi lohna lantir nise, tiin bul an tan a ni.
Tarlan tawh thin angin, scholarship second installment sum la dawng lo hi zirlai 19495 an awm a, Mizoram chhunga zirna in 36 atangin zirlai 5023 bakah pawl XI leh XII zirlai 11462 leh Mizoram pawna awm zirlai 3010 an ni.