Lengpui Airport chu Indian Airforce kutah ni lo, Airport Authority of India kuta hlan dan zawn that leh tur nge tih dap a ni dawn tih chief minister Lalduhoma chuan a sawi.
Tunkar Nilainia New Delhi-a Union Home minister, Union Civil Aviation minister leh National Security adviser te ho a kawmnaah Mizoram tan thil pawimawh an sawi a. Hetah hian Lengpui Airport chungchang pawh a tel tih chief minister chuan a sawi.
Lengpui Airport security duty atan sawrkar laipui chuan CISF (Central Industrial Security Force) mi 200 vel rawn dah a tum a, heti zat zat hi a ngai loa, mi 100 a tawkah an ngai tih a thlen thu a sawi.
Airport hi AAI nen tih tlan dan kawng zawn that leh tur nge tih an lo rawt a. Hei hi Mizoram sawrkar, NGO leh political party duh dan a ni tih a hrilh thu a sawi bawk.
“Union Home minister leh Union Civil Aviation minister nen kan pathumin sawiho leh phawt nise, kan ti. Airport hlanchhawn hi Indian Air Force ngawr ngawr kan tum a ni loa, AAI leh option dang atan kan la inhawng reng. 16th Finance Commission-ah pawh airport tih changtlunna tur kan thlen a ni. Union Home minister hian hma min lakpui tak tak a tum niin ka hmu a, helam kawng hi kan zawh thei thut maithei a ni,” a ti.
Aizawl laili atanga Assam Rifles chhuahsan tur thlahnaa telpui tura a sawm angin Union Home minister hi a lo chho dawn tih chief minister hian a sawi a. Assam Rifles chhuahsan hunah helai ram hman dan tur buaipuitu bik Committee an din dawn a, political party tin leh NGO-te pawh telh an ni dawn tih a sawi.
AR ram chhuahsan turah hian Assembly House zahawm leh mawi deuh khawi emaw laiah dah theih a ni angem, tih rilrua lo ngaihtuah turin House member-te a chah tih a sawi a. Assembly House thar kan mamawh zia sawiin, “India ramah Mizoram chu Assembly House building nei chhe ber kan ni hial tawh maithei,” a ti.
AAI kutah zawk Lengpui Airport hlan ngaihtuah dan dap leh dawn
Get real time updates directly on you device, subscribe now.
Prev Post
Next Post