MCC hlih hunah ration sem dan thar kalpui tum

Supply department-in card var nei tana ration buhfai man to deuh zawka siam a tum chu MP inthlan model code of conduct hlih hnu ah a taka kalpui tan tum a ni.Chief minister hoin Mizorama thar chhuah buhhum leikhawm chungchang relin Nilaini khan Agriculture minister PC Vanlalruata, Food Civil Supplies & Consumer Affairs minister B Lalchhanzova leh official dangte an thukhawm a. Hetah hian FCS&CA minister chuan sawrkarin buhfai lei leh hralh a kalpui thin dan chu tihdanglam hlek an tum thu hi sawi nawnin, model code of conduct hlih hunah a taka kalpui tan an tum dawn a. Chu kalphung tharah chuan kumtin sawrkar sum vaibelchhe 70 vel an hum thei dawn tih a sawi.
Minimum support price pea Mizoram loneitute tharchhuah buh hum man man deuh taka leisak theih a nih leh nih loh an sawi a. Chumi kaihhnawih buh thar chhuah tihpun dan tur leh a chingtu tur thlante, a chi inang chin a tul dan, a leikhawm dan, a herna leh a phurh kual dan thlengin an sawi ho.
Tripura leh Assam sawrkarin hetiang an kalpui dan report pawh a zirchiangtute hnen atangin an ngaithla a. Chipchiar zawka zirchiang tur team Supply minister kaihhruaina hnuaiah din a ni.