MCC-in zirlai titha chawimawi

Mizoram Christian College (MCC) chuan an college-a zirlai lut thar lawmna leh under graduates exam result-a zirlai tithate chawimawina Zirtawpni khan an hmang.
Hmanpuitu Youth Affairs minister Lalnghinglova Hmar chuan zirlaite chu ram dang an thlen hlat poh leh anmahni atanga hnam dangin hriat an duh tur a nih avangin mahni subject chiah a nih loh pawhin mahni ram history, geography leh politics lam engemawchen tal ngaihven turin a chah a. India ram Gross National Income za zela 34 chu kum 15-29 inkarte sum lakluh a ni, tiin, thalaite chu an puitling tawh tih inhriaa ruahmanna tha neih tum turin a chah.
India ram pumah hun inang hman a nih avangin hmarchhaka awmten state dangte leh kan hnaivaia awm ram dangte aiin hun kan hloh nasa tih minister hian a sawi a. Zirlaite chu hun vawngdik tur leh daihzai thei ang bera hman tum turin a chah. Zir sang satliah belhchian dawl lo nih tum lo tura fuihin, zirlaibu bakah hriatzauna dang bih tam turin a chah bawk.
An college-a zirlai thar 137 chu College principal Dr Tawnenga’n lawmlutin a tawngtai sak a. Synod executive secretary i/c MCC Rev Dr K Lallawmzuala pawhin thu a sawi. Zirtirtu leh zirlai zinga library tlawh tam berte chawimawina thilpek a hlan an ni bawk.
Mizoram University hnuaia tunhnaia UG exam result tihchhuahah MCC-a department tin pass percentage a tha a, department pathumah University rank holder an nei. Arts stream-ah 78.85% pass-in Mizoram pumah 6-na an ni a; commerce stream leh management-ah 100% pass-in 1-na leh 2-na an hauh. Heng bakah hian NEP hmang chin 2nd semester result chhuakah arts-ah 86.15% pass-in Mizoramah 2-na an ni a; commerce-ah 60.87% pass-in 3-na an ni.
MCC-in rank holder pathum an neih – Public Administration topper Daniel Rinmuanpuia, English-a 3-na Magdalene Laltlanhlui Khiangte, leh Sociology-a 5-na H. Lalthantluanga bakah department tina titha berte hnenah chawimawina hlan a ni.
Mizoram Presbyterian Kohhran enkawl Mizoram Christian College hi 2020 October 5-a din niin, Tanhrila campus chu peihfel a la nih loh avangin Mission Vengthlang-ah an awm mek. Tunah hian principal bakah zirtirtu 31, non-teaching staff 8 leh zirlai 313 neiin, arts, commerce leh management-ah subject 7 zir theih a ni.