MCS (Combined) prelim exam hmachhawn tum 4740 an awm
MCS (Combined) prelim exam
hmachhawn tum 4740 an awm
Mizoram Civil Services (Combined Competitive) Exam buatsaih a ni dawn a, preliminary examination hmachhawn tuma dilna thehlut mi 4740 an awm.
Mizoram Public Service Commission (MPSC) chuan MCS (Combined Competitive) Preliminary Exam 2025 chu August 8 (Zirtawpni) hian Mizorama exam centre hrang hrangah a buatsaih dawn a. Aizawla institution /venue 6 bakah district headquarters tinah neih a ni ang.
Preliminary exam hi shift hnih – chawhma leh chawhnu ah then a ni a. 1st shift-ah Paper-I (general studies) niin, chawhma dar 10.00 ah tan a ni ang. 2nd shift chu chawhnu dar 2.00 ah tanin, Paper-II (aptitute test) a ni thung ang. Paper-II hi qualifying paper atan chauha hman tur a ni a, he paper-ah hian 33% tal candidate-in a hmuh phak a ngai. Paper-II a 33% hmu phak zingah paper-I a mark hmu sang apiangin preliminary exam hi an paltlang dawn a ni.
MCS (Combined Competitive) Prelim Exam 2025 atan hian mi 4740-in application an thehlut a. Aizawl-ah mi 3856 (PwBD 15), Lunglei-ah mi 252 candidates (PwBD 2), Siaha 130, Champhai 122, Kolasib 120 (PwBD 2), Serchhip 74 (PwBD 1), Lawngtlai 57 (PwBD 1), Mamit 36 (PwBD 1), Hnahthial 35 (PwBD 1), Saitual 32 (PwBD 1), Khawzawl 26 (PwBD 1), an vaiin 4740 (PwBD 25 an awm a, candidate-te hi an awmna district-ah theuh an exam thei a ni.
Tun tumah hian unreserved post 34 a awm a. MPSC Exam inkaihhruaina dan hman mek ang chuan, Main Exam-a thu thei tura prelim exam paltlang tur mi 340 an awm dawn tihna a ni. Mizoram sawrkarin Main Exam-a optional subject tihbona atan MCS (Combined Competitive Examination) Rules 2025 a siam thar avang leh, he notification chhuah hnuah chauh inbuatsaihna kalpui theih a nih avangin kum dang zawng aiin prelim exam buatsaih hun a tlai hret a ni.