MCU hnenah P&E an insawifiah Insawifiahna la ngaihtuah dawn

Power & Electricity department hotute chuan bill chhiarna meter khawl an thlak kaihhnawihah bill sang nia lang chu Mizoram Consumer Union hruaitute hnenah an sawifiah a. Union lam hian insawifiahna hi pawm nghal mai loin an la ngaihtuah tha dawn nia sawi a ni.
P&E engineer -in- chief JH Malsawma hoin department hotute chuan Mizoram Consumer Union (MCU) Hqrs hruaitute an kawm a. Tunlai electric bill chungchang inhrilhfiah leh sawiho a ni.
Billing software hman mek SAP chu a tunlai (up-to-date) tawh loh bakah tunlaia information kan duh ang min pe thei tawh lo tih an sawi a. Hetihlai hian sawrkar laipuiin RDSS Scheme hnuaiah mipui mamawh information pe thei leh mipui tana hman awlsam tur software changkang tak (IT/OT sofware) a siam a. Hemi hman tum hian hma lak mek a ni tih sawi a ni. Tuna hman lai, khawl hlui (SAP) atanga khawl thar (IT/OT) a consumer data insuan (transfer) chhung a rei deuh avangin a hun takah consumer meter reading lak theih a ni lo tih department hotute hian sawi.
Bill reading lak tlai avanga rate sang zawk anga mipuiin bill chawi belh nia an inhria chu, an chawi tam phah lohnan department-in pro-rata hmanga bill hun dik taka bill angin siamrem sak an ni tih inhrilh a ni a. Hetihlai hian P&E hotute chuan an hmanrua hi khawl thil a ni a, engemaw thil fello a awm a nih pawhin department chuan consumer-te complain hi tha takin lo dawngsawng a, hma lak nghal zel an tum tih an sawi a ni.
Tuna an billing application (PEDM consumer app) ah hian mahni in atanga complain mai theih niin, P&E officer-ten rang takin app kaltlangin an harsatna sutkian pui theih a ni tih sawi a ni a. Entirna siamin, bill reading lak tlai avangin thla hnih chhunga unit hman zat unit 300 ni ta se, bill chhut dan pangngaiah chuan unit 100 chu rate hniama bill tur a ni a, unit 200 dang hi rate sang zawka bill tur a ni. Pro-rata hmanga chhut a nih avangin thlakhat ang zela siamrem a ni a, a bill dan chu – 1st 30 days ah unit 100 rate hniam, unit 50 rate sang; 2nd 30 days ah unit 100 rate hniam, unit 50 rate sang
Hetiang hi a nih avangin thlakipa chawi dan tur anga siam vek a ni a, chutihrualin, thla hnih bill vawikhatah a kal avangin electric bill hi a lang sang ta niin an sawi.
P&E department hotute leh MCU hruaitute hian P&E department corporation-a inleh dan tur an sawiho bawk a. Tunah hian corporation-a lut turin hma lak zel a ni a, a bultanna atan P&E department hi strategic business unit (SBU) pathum – Generation SBU, Transmission SBU leh Distribution SBU ah then (unbundling) phawt tum a ni tih sawi a ni.
P&E department insawifiahna hi MCU lam hian an pawm nghal mai lo nia thu dawn a ni a. Committee koin an la ngaihtuah dawn a, chuta tang chuan hma an lak zel dan tur a hriat theih dawn tih sawi a ni.
The Aizawl Post thudawn danin, April & May electric bill a sang hlawm hle a, a chhan nia lang chu, ni 30 dana billing cycle lak thin chu ni 50-55 ah te lak a ni. Unit 100 ah Rs. 4.90, unit 100-200 ah Rs. 7.10, unit 200 leh a chunglamah Rs. 8.20 bill thin chu, billing cycle tih danglam leh a hun a rei tak avang hian unit tam takah a rate sang berin department-in a lak vang nia ngaih a ni tih sawi a ni.
Tuna software thar hman avanga billing cycle tih danglamah hian consumer thenkhat chu an bill pangngai bak cheng sang chuang bill an awm bakah a aia hniam leh sang zawk pawh an awm nual tih sawi a ni a. Hemi siamthat leh hi sawrkarin ngaihtuah rang se tih chu district hrang hrang atanga consumer union-te duh dan a ni tih sawi a ni a. Billing system thar chu state puma hmang nghal burh loin a enchhinna Power Division siam nise an duh tih an sawi bawk.