Medical bill dik…
Mizoram State Health Care Society-in ‘quality management system’ tha tehfunga ISO 9001: 2015 certification a hmuh lawmna tun hnaia neih hmanpuitu health minister chuan, a hun taka empanelled hospital hnena bill pek chhuah chu sawrkarin a ngaipawimawh tih a sawi a. Chutih rualin, empanelled hospital lam pawh ‘dik taka bill siam a, felhlel awmtir lo turin kan ngen’ a ti bawk.
Kan hriat angin, Mizoram sawrkar hnathawk, dik lo taka medical reimbursement bill tumte chu Mizoram State Health Care Society hian nikum khan an lo dap chhuak tawh a. Kum 2024-2025 chhunga MR bill dik lo hmuhchhuah chu cheng vaibelchhe 14 a ni a, hei hi hmuhchhuah ni lo ta se, sawrkarin cheng nuai 1400 a hloh dawn tihna a ni. Sawrkar hi mipui siam a ni kan ti a, ‘sawrkar sum’ chu ‘mipui sum’ tihna a nih chu. Kum 2024-25 chhunga dik lo taka MR bill tum ten nang leh keia sum cheng nuai 1400 teh meuh mai chu fanghma no ei an lo tum reng mai tihna a ni ber awm e.
Health minister-in dik taka bill siam tura empanelled hospital-te a ngen avang hian empanelled hospital zingah dik lo taka medical bill siam an awm tihna a ni kher lo thei a, sawrkarin a hun taka bill pek a ngaih pawimawh ang bawkin empanelled hospital-te pawhin bill dik ngai pawimawh ve se a duh tihna a ni mai awm e.
MR bill dik lo chungchangah, bill dik lo siam tur hian empanelled hospital thawktute leh MR bill-tu tur (sawrkar hnathawk) te an inthurual a ngai a. Empanelled hospital thawktute zingah pawh hian, bill siamtu, hospital pharmacy emaw local pharmacy enkawltute leh doctor-te an inhnamhnawih a ngai. Bill dik lo siam tur chuan, prescription ziah danglam a ngaih thin avangin doctor-te nena inthurual a ngai a; doctor an inhnamhnawih lo a nih chuan, bill siamtuten prescription lem an siam tihna a ni thei bawk. Hospital pharmacy-a damdawi awm lo, pawn lam pharmacy dawr a ngaih changin pawn lam pharmacy-ten cash memo dik lo an lo pe chhuak dawn tihna a ni a, Bill dik lo siam tur hian mi engemawzat an inthurual a ngai tihna a ni ber awm e. Hetianga dik lo taka thiltih (malpractice) thleng thei veng tur chuan system thar siam a tul tihna a ni ber mai.
Eng pawh ni se, quality management system tha tehfunga ISO 9001: 2015 certification hmu thei state kan nih mek ruala, dik taka bill siam tura inngen kan ngai hian, ‘inngen ngaia min siamtu’ a awm leh si em ni ang, tih ngaihdan te pawh a neih theih rum rum mai! Fel fai chho zel turah inbeisei phawt mai teh ang!