Meghalaya CM-ah Conrad Sangma, Nagaland CM-ah Neiphiu Rio

National People’s Party (NPP) hotu Conrad K. Sangma chu March 7 khan a zawna a term hnih nan Chief Minister of Meghalaya ni tura lakluh a ni.
Governor Phagu Chauhan chuan Raj Bhawan, Shillong-ah Prime Minister Narendra Modi, Home Minister Amit Shah, Assam Chief Minister Himanta Biswa Sarma leh BJP national president J.P. Nadda te awm laiin rinawmna thu tiamtirin a la lut a ni.
Prestone Tynsong leh Sniawbhalang Dhar, NPP MLA ve ve te pawh Deputy Chief Minister atana lakluh an ni a, hei hi party tena State a region pathum – Garo, Khasi leh Jaintia Hills aiawh te neih an tumna kal zel a ni.
Sangma hi Garo Hills chhuak a ni a, Tynsong hi Khasi Hills chhuak niin Dhar hi Jaintia Hills mi leh sa a ni thung a. Khasi leh Jaintia Hills hi region khata ngaih a ni bawk.
Minister tur pakua lakluh nghal niin an zinga panga chu NPP an ni a, pahnih chu United Democractic Party (UDP) MLA te niin BJP leh Hill State People’s Democratic Party (HSPDP) aiawh pakhat ve ve an awm bawk.
Minister lakluh zingah M. Ampareen Lyngodh chu hmeichhe awm chhun a ni a, Abu Taher Mondal chu non-tribal awm chhun niin an pahnihin NPP ve ve an ni bawk.
NPP te hi tun inthlanah party lian ber niin State a seat 60 awmah seat 26 an la a, inthlanna erawh seat 59 ah chauh neih niin UDP candidate Sohiong constitutency a mi chu campaign neih laia a thih avangin inthlan thulh aa ni.
Sangma hian MLA 45 a nei a, an party bakah UDP MLA 11, BJP MLA pahnih, HSPD leh People’s Demcoratic Front leh Indpedent MLA pahnih ten an thlawp bawk.
Shillong-a Conrad Sangma sorkar lakluh inkhawm zawh hian Modi leh Central BJP leader te leh Sarma te chuan Kohima panin Neiphiu Rio, Nagaland Chief Minister atana a term nga na tura lakluh inkhawmah an tel zui nghal bawk a.
Nagaland-ah hian BJP MLA Yanthungo Patton leh TR Zeliang te chu Deputy Chief Minister atana lakluh a ni bawk.
Nagaland inthlanah hian NDPP leh BJP te chu tang kawpin seat an insem a, NDPP te hian seat 25 la in BJP te hian seat 12 an la a ni. Nagaland ah hian opposition an awm dawn lo tluka ngaih a ni a, party tin te chuan NDPP-BJP sorkar an thlawp a ni.