Mei zu mi te memory a chak lo
Mithiam ten zirchianna an neih hnuah mei zu mi te chu a zu ve lo te aiin a hriatreng theihna (memory) a chak lo zawk a, a tlangpuia lakin nikhatah an thil tawn hmun thuma thena hmun 1 vel an theihnghilh thin niin an sawi a, chu chu meizu ve lo te aiin a sang zawk hle a ni.
Northumbria University-a mithiam ten zirchianna an neihah chuan meizu mi ten mei zuk an sim chuan rei vak loah meizu lo te ang bawkin an hriatreng theihna hi a lo pung ve leh nghal mai thei niin an sawi bawk.
He zirchiannaah hian mi 70, kum 18-25 te hman an ni a, an nitin hun hman dan te enthlak niin, a hnuah an thil tih leh an tawn zingah thil tê tham tê te an zawt leh ta thin a ni. An thil zawh zingah hian eng hle nge a ngaihthlak tih te leh tu tu nge a biak tih te pawh a tel. Hei hi ‘real world memory test’ an ti.
Meizu mite chu an performance a chhe hle a, an thil tih leh tawn an ngaihtuah let ngial hnuah 59% vel chauh an ngaihtuah chhuak leh thei a, chutih laiin meizuk bansan te chuan 74% thleng an hrechhuak leh thei a, meizu ngai reng reng lo te erawhin 81% thleng an hrechhuak leh thei a ni.
Zirchiannaa an hotu Dr Tom Heffernan chuan he result hi anti-smoking campaign nan pawh a tha dawn hlein a sawi a. “UK-ah meizu mi maktaduai 10 vel an awm a, US-ah maktaduai 45 vel an awm bawk, chuvangin meizukin kan hriatreng theihna a nghawng dan hi kan puanzar nasat a ngai ta hle a ni. Meizuk sim hi taksa hrisel nan a tha tih chu kan hre theuh a, mahse, he zirchianna hian meizuk bansan thatna dang a rawn pholang a ni,” a ti.
He zirchianna chungchang hi London chhuak Daily Mail chanchinbu-ah tarlan a ni.
Mei zu mi te memory a chak lo
Get real time updates directly on you device, subscribe now.