“Meichher” chhitu tan Padma Shri chawimawina

Drama an ziah hian ‘act’ tih leh ‘scene’ tih a awm thin a, Mizo tawng chuan ‘act’ hi chan, ‘scene’ hi lan tih a ni. ‘Lan’ tih hi a ching chhuaktu chu R Lalrawna a ni.
A hma chuan Mizo tawng drama bu-ah ‘act’ leh ‘scene’ hi ‘chan’ ti vekin an hmang a, Shakespeare drama ‘Macbeth’ a lehlin, 1965-a Assam Publication Board-in an chhuahah khan ‘chan’ leh ‘lan’ tih hi a hmang. Vawiin thlengin drama ziaktute leh a changtute’n hei hi an hmang ta zel a ni.
60s vela thu leh hla lama inhmang tawh R Lalrawna hi padma shri chawimawina dawng tura thlan a ni a, “Pathian malsawmna ka va’n dawng hnem em!” amah chuan a ti.
Education department hnuaia adult education wing-in ziak leh chhiar tihhmasawn nana an chhuah Meichher chanchinbu bultantu a ni a, he chanchinbu hi Mizo literature tihmasawntu pawimawh a tling. Kum 25 chhung editor niin a enkawl a, a hming leh Meichher tih hi mi thenkhat tan chuan thil inhnaih tak a ni ang.
A ziah leh a lehlin chu thuhran ni se, he a chanchinbu enkawl hi literature-ah meichher a tling a, hranghlui lehzual Kaphleia te, L Biakliana te hnua Mizo writer-te kutchhuak chhuahna bu tih theih hial khawp a ni.
“Kaphleia leh Biakliana te kha chu an u lehzual deuh a, C |huamluaia kutchhuak a chhuak lo bawk a. Anni tih loh kan writer hranghlui dangte kutchhuak chu Meichher-ah khan a chhuak ang. Meichher chawmtu an ni a, anni zarah Meichher pawh miin an lo ngaina ve a,” R Lalrawna chuan a ti.
Lehkhabu 14 a ziak tawh a, lehkhabu 15 a let tawh bawk. A kutchhuakte hian ngaihhlut a hlawh a, chhut nawn pawh a hlawh. JF Laldailova leh James Dokhuma te lehkhabu tinungtu pawh a ni a, vawiin thlengin thangtharin an chhiar theih tura la chhuah thintu a ni. JF-a love letter bu phei hi chu ama puah khawm liau liau a ni. Mi lehkhabu chhuah tur a endiksak tawh phei chu chhinchhiah sen a ni lo ang.
Kum 85-na a hmang mek a, thu leh hla lamah a la chawl lo. Printing press a nei a, computer thut chilhin hna a la thawk thin. Kum 80 chuang a nih hnu-ah lehkhabu lehlin tha ber lawmman a la dawng a, a lehkhabu lehlin “Davida” tih chu 2022 chhunga lehkhabu lehlin tha berah Mizo Writers Association-in an thlang a ni.
Pawl 8 a nih laiin a thianpa nau chhiar atan an sikul library-a mi Arabian Nights bu thum a let a, hei hi thu leh hla lama a inhman tannaah a ngai. Mahse hemi tuma a lehlin hi hmuh tur a awm tawh lo. 1958-ah, Lunglei High School-a a kal laiin annual magazine-ah a thuziak leh a hla phuah a chhuak a, hei hi mi dang chhiar theih tura a thuziak a chhuah hmasak ber a ni.
60s atangin thu leh hla lamah hian a inhmang ta ngar ngar a, Mizo writer hrang hrangte hre chiangtu pawh a tling ang. Vawiin thlengin thangthar writer-te nel leh ngainat a la tling.
Padma Shri hi Literature & Educationhuangah a dawng dawn a, an inhlan hun tur a la hriat loh. |awng humhalh leh tihhmasawnna lama a thawh hlawk avangin 2024 khan Bhasha Samman chawimawina a lo dawng tawh bawk.