Meitei firfiakte leh CRPF chet dan chhui turin MHA an phut

Meitei firfiakte leh CRPF chet
dan chhui turin MHA an phut
Manipur Jiribam district-a tunhnaia Meitei firfiakte leh CRPF chet dan chu a dem takzet tih Mizo Zirlai Pawl chuan sawiin, Union Minisrtry of Home Affairs-in a chhui an phut tih an sawi.
MZP Gen. Hqrs thuchhuak chuan, Meitei firfiakten Jiribam district Zairawn khuaa Zosangkim Hmar (31) nasa taka an sawisak hnua, rawng taka an that zui chu hriatthiam har a ti hle tih sawiin, tunlai khawvelah hetianga ran ang maia khawsakna thleng hriat tur a awm chu a dem takzet tih a sawi.
Manipur-a chi leh chi inkara buaina chuan thla 19 a awh tawh a, buaina in ziaawm lam pan tawh tura beisei a nih laiin, Meitei firfiakte tharum thawhna leh pawisak neih lohna chuan buaina a ti punlun leh mek tih MZP hian sawiin, Zofa hnam pasaltha mi 11-in Jakhradwar Jiribam-a nunna an chan leh ta chu pawi a tiin, Zofate luah chin ram pawngnek a, rûntu hmelma lak atanga ram venghimtu, hnam pasalthate zahna chibai a buk a, an thisen a thlawnin a luang ral dawn lo tih a sawi.
Remna leh muanna ti thuanawp leh buaina ti punlun zawnga Meitei firfiakte hmalakna chu titawp nghal turin MZP chuan a ngen tih sawiin, ‘Rawng taka an chetna hi tunlai khawvelah eng hnam leh ram mahin an pawm theih loh thil a nih avangin, India ram hmel pawh a ti bal takzet a. Heng firfiakte hi a rang thei ang bera tudai turin sawrkar laipui kan ngen a ni,’ a ti.
Tan bik nei loa ban phar tura ngaih CPRF, Jiribam district-a an chet dan chuan CRPF leh Manipur sawrkar bakah India hmel a tibalin hle tih MZP hian a sawi a. ‘CRPF chu mipui chunga rawng taka che thin, tualthattu anga Zofaten an hrereng tawh tur hi pawi kan ti a. He thil tisualtu hi a rang thei anga zawng chhuaka an phu tawk hremna pe turin Union Home ministry kan phut a ni,’ a ti.