ZORO-in CRPF chet dan dem Unaute thlavang hauh inpeih

Manipur Jiribam district-a Meitei ho chet dan leh CRPF chet dan chu an dem hle tih Zo Re-Unification Organisation (ZORO) chuan sawiin, unaute thlavang hauha penchhuak turin an inpeih reng tih an sawi.
ZORO Gen. Hqrs. thuchhuak chuan November 7 zana Meitei-ten Zairawn khua Jiribam district-a Zohnahthlak khua run a. Pi Zosangkim Hmar nasa taka sawisa a, rawng takin an that bakah an pawngsual zui chu na a tiin, pawi a ti takzet tih a sawi.
November 11 tlai lama Zofa unau thalai rual 10 Borobekra- Jakhuradhar, Jiribam district-a CRPF-in an kaphlum pawh pawi a tiin, CRPF an dem hle tih a sawi. ‘Mipui venghim tura dahin mipui min sawisa ta mai hi kan hre thiam lo hle a ni,’ a ti.
Manipur-a Meitei leh Zofa unaute inkara inhmuhthiam lohna thleng mek chuan ziaawm lam a pan dawn emaw an tih lai a, Zofa unaute chunga tualthihna rapthlak tak a thleng chu pawi a ti hle tih ZORO hian a sawi.
‘Hetianga Meitei-in kan unaute chunga kut an thlak zel dawn a nih chuan kan ngawi mai mai dawn loa, kan unaute thlavang hauha penchhuak turin kan inpeih reng a, Mizorama awm Meitei pawh lo fimkhur turin kan chah nghal a ni,’ a ti.